ورلڈ کپ کوالیفائر راؤنڈ کھیلنے کے لیے اپنی جگہ بنا لی۔
ڈھاکا میں کھیلے گئے دوسرے میچ میں قومی ٹیم نے میچ کے آغاز کے ساتھ ہی میزبان ٹیم پر تابڑ توڑ اٹیک کیے، پاکستان کی جانب سے سفیان خان اور رانا وحید نے 2،2 گول اسکور کیے، رانا ولید، عماد بٹ، حنان شاہد اور افراز خان نے ایک،ایک گول اپنے نام کیا۔
شاندار جیت کے ساتھ ہی قومی ہاکی ٹیم نے ورلڈ کپ کوالیفائر کے لیے بھی کوالیفائی کر لیا، آئندہ برس شیڈول ورلڈکپ کے لیے کوالیفیکشن راؤنڈ سے 7 ٹیموں کا انتخاب کیا جائے گا۔
ورلڈکپ 2026 میں 16 ٹیمیں مدمقابل آئیں گی، جس کے لیے بیلجیم، نیدرلینڈز، آسٹریلیا، اسپین اور ارجنٹینا براہ راست کوالیفائی کرچکی ہیں جب کہ جرمنی، بھارت، نیوزی لینڈ اور جنوبی افریقہ بھی عالمی کپ میں اپنی جگہ بنا چکی ہیں۔
خیال رہے کہ پاکستان نے پہلے میچ میں میزبان بنگلہ دیش کو 2 کے مقابلے میں 8 گول سے شکست دی تھی، دونوں ٹیموں کے درمیان تیسرا اور آخری میچ 16 نومبر کو کھیلا جائے گا۔
===========================
عمران خان اور اہلیہ بشریٰ بی بی کے ساتھ جیل میں ناروا سلوک ہو رہا ہے
مجھے بانی سے ملاقات کی اجازت نہیں دی جا رہی، میں مل کر پالیسی گائیڈلائنز لینا چاہتا ہوں، حکومتی فنڈز پر کسی کو ذاتی تشہیر کی اجازت نہیں ہوگی، میرٹ اور شفافیت کو یقینی بنایا جائےگا۔ وزیراعلیٰ محمد سہیل افریدی کی زیرصدارت کابینہ کا اجلاس
عمران خان اور اہلیہ بشریٰ بی بی کے ساتھ جیل میں ناروا سلوک ہو رہا ہے
پشاور(۔ 14 نومبر 2025ء) وزیر اعلیٰ خیبر پختونخوا محمد سہیل افریدی نے الزام عائد کیا ہے کہ عمران خان اور اہلیہ بشریٰ بی بی کے ساتھ جیل میں ناروا سلوک ہو رہا ہے، مجھے بانی سے ملاقات کی اجازت نہیں دی جا رہی، میں مل کر پالیسی گائیڈلائنز لینا چاہتا ہوں۔ اعلامیہ کے مطابق وزیر اعلیٰ خیبر پختونخوا محمد سہیل افریدی کی زیر صدارت صوبائی کابینہ کا اہم اجلاس منعقد ہوا۔
جس میں وزیر اعلیٰ نے اپنی حکومت کی پالیسی گائیڈلائنز پیش کیں اور آئندہ حکومتی ترجیحات کا واضح لائحہ عمل دیا۔ وزیر اعلیٰ نے گزشتہ روز امن جرگے میں شریک تمام سیاسی جماعتوں کا شکریہ ادا کیا۔وزیرِ اعلیٰ خیبر پختونخوا محمد سہیل افریدی نے اپنے پالیسی بیان میں کہا کہ سیاسی اختلافات اپنی جگہ لیکن امن ہم سب کا مشترکہ ہدف ہے، صوبائی اسمبلی کی تمام قراردادوں پر مکمل عملدرآمد کیا جائے گا۔
سب سے اہم قرارداد ’ ایکشن اِن ایڈ آف سول پاورز ‘ کے خاتمے سے متعلق ہے جو بنیادی انسانی حقوق کے منافی ہے، وزیر اعلی کا ریڈیو پاکستان پر 9 مئی حملے کی تحقیقات کے لیے انکوائری کمیشن قائم کرنے کا اعلان ، کمیشن تمام شواہد، بشمول سی سی ٹی وی فوٹیج، جمع کر کے اپنی رپورٹ کابینہ کو پیش کرے گی۔ وزیراعلیٰ خیبر پختونخوا نے کہا کہ سود سے پاک خیبر پختونخوا موجودہ حکومت کی اولین ترجیحات میں شامل ہے، ہم خیبر پختونخوا کو سود کے ناسور سے پاک کرینے کے لیے پالیسی بنا رہے ہیں اور اسلامک انوسٹمنت متعارف کرائیں گے۔
وزیراعلیٰ سہیل آفریدی نے الزام عائد کیا کہ صوبائی اسمبلی کی متفقہ قرارداد ہے کہ بانی عمران خان اور ان کی اہلیہ بشریٰ بی بی کے ساتھ جیل میں ناروا سلوک ہو رہا ہے۔ 4.5 کروڑ عوام کے منتخب وزیر اعلیٰ کو اپنے بانی سے ملاقات کی اجازت نہیں دی جا رہی، میں عمران خان سے ملاقات کر کے پالیسی گائیڈلائنز لینا چاہتا ہوں، بانی چیئرمین اور ان کی اہلیہ کو اپنے ذاتی معالج سے ملاقات کی اجازت بھی نہیں دی جا رہی، حکومت کے تمام تر اقدامات اور اصلاحات منتخب نمائندوں کی مشاورت سے کی جائیں گی، بانی عمران خان کے ویژن کی مطابق کرپشن کے خلاف زیرو ٹالرنس پالیسی پر سختی سے عمل کرے گی۔
وزیراعلیٰ سہیل آفریدی نے کہا کہ حکومتی فنڈز پر کسی کو بھی ذاتی تشہیر کی اجازت نہیں ہوگی، کابینہ اراکین تمام فیصلے میرٹ اور مکمل شفافیت کو مدنظر رکھ کر کریں، تمام قوانین عوامی مفاد میں ہونے چاہئیں، کوئی بھی قانون عوامی مفاد کے منافی ہو تو اسے ختم کیا جائے، تمام قوانین کا ازسرِ نو جائزہ لیا جائے، خامیوں کی نشاندہی کر کے ضروری ترامیم تجویز کی جائیں۔
