شہر قائد کے باسی ابھی ای چالان سے صحیح آشنا نہیں ہوئے کہ اب روبوٹ ان کا ٹریفک چالان کریں گے۔
کراچی میں 27 اکتوبر سے ای چالان کا آغاز کیا گیا اور ٹریفک قوانین کی خلاف ورزی کرنے والی گاڑیوں کے مالکان کو گھر بیٹھے بھاری مالیت کے چالان موصول ہونے لگے۔
بھاری بھرکم چالان سے نالاں شہر قائد کے باسی ابھی ان ای چالان سے صحیح طریقے سے آشنا بھی نہ ہونے پائے تھے کہ اب وہ جلد ہی سڑکوں پر روبوٹ کو ٹریفک پولیس کے روپ میں دیکھیں گے، جو ان کے چالان کریں گے۔
جی ہاں یہ بات کوئی بے پر کی نہیں بلکہ جلد حقیقت بننے جا رہی ہے کیونکہ اس کا باضابطہ اعلان خود ڈی آئی جی ٹریفک پیر محمد شاہ نے کراچی میں ایک تقریب سے خطاب کرتے ہوئے کیا۔
ڈی آئی جی ٹریفک نے ایک تقریب سے خطاب میں کہا کہ کراچی میں ای چالان کے لیے ایک تیسرا طریقہ بھی متعارف کرا ہے ہیں اور وہ ربورٹس کے ذریعے ہوگا۔
انہوں نے کہا کہ آئندہ ماہ سے ہم مختلف سڑکوں پر نو پارکنگ اور نو ٹو لین کے بورڈز لگا رہے ہیں۔ صدر اور طارق روڈ سمیت مختلف سڑکوں پر ربورٹس چلیں گے۔
پیر محمد شاہ نے بتایا کہ ان روبوٹس کی اسپیڈ 20 کلومیٹر فی گھنٹہ ہو گی۔ یہ روبوٹس چلتے ہوئے گاڑیوں کو اسکین کرتے ہوئے جائیں گے اور جو بھی گاڑی پارکنگ یا ٹریفک قوانین کی خلاف ورزی میں ملوث ہو گی۔ اس کی رپورٹ کرے گا جس کے بعد خلاف ورزی کرنے والوں کو ای چالان موصول ہو جائے گا۔
