بالی ووڈ کے سپر اسٹار شاہ رخ خان کے صاحبزادے آریان خان اب بطور ہدایت کار بڑی اسکرین پر قدم رکھنے کی تیاری کر رہے ہیں۔
آریان خان کی او ٹی ٹی سیریز “دی بیڈز آف بالی ووڈ” نے نیٹ فلکس پر شاندار کامیابی حاصل کی، جسے ناظرین اور ناقدین دونوں نے خوب سراہا۔ اب وہ اپنے اگلے پروجیکٹ کے لیے پرجوش ہیں اور اس بار سینما کے لیے ایک نئی فلم بنانے کا ارادہ رکھتے ہیں۔
بھارتی میڈیا رپورٹ کے مطابق، قریبی ذرائع کا کہنا ہے کہ آریان خان اپنا دوسرا پروجیکٹ 2026 میں شروع کریں گے۔ فلم کی کہانی اور کاسٹ فی الحال خفیہ رکھی گئی ہے، تاہم یہ بات طے ہے کہ شاہ رخ خان اس فلم کا حصہ نہیں ہوں گے۔
ذرائع کے مطابق آریان خان چاہتے ہیں کہ وہ پہلے اپنے نام اور صلاحیت سے کامیابی حاصل کریں، اس کے بعد اپنے والد کے ساتھ کسی فلم میں کام کریں۔ بتایا گیا ہے کہ آریان اور شاہ رخ خان نے ایک مشترکہ فلم کا تصور تیار کر لیا ہے، جس پر 2027 میں باقاعدہ کام شروع ہونے کا امکان ہے۔
