سوڈان میں جاری خانہ جنگی کے دوران ایک بھارتی شہری کو آر ایس ایف کے جنگجوؤں نے اغوا کر لیا ہے۔۔ رپورٹس کے مطابق جنگجوؤں نے اڑیسہ کے رہائشی آدرش بہیرا کو یرغمال بنا لیا ہے۔ اہلِ خانہ کو موصول ہونے والی وڈیو میں دکھایا گیا ہے کہ ایک شخص دو مسلح سپاہیوں کے درمیان بیٹھا ہے۔ ان میں سے ایک سپاہی اس سے پوچھتا ہے، ”کیا تم شاہ رخ خان کو جانتے ہو؟“
این ڈی ٹی وی کے مطابق 36 سالہ آدرش بہیرا کو شہر الفاشر سے اغوا کیا گیا، جو بھارتی ریاست اڑیسہ کے ضلع جگت سنگھ پور سے تعلق رکھتا ہے۔ خرطوم سے تقریباً ایک ہزار کلومیٹر کے فاصلے پر واقع ہے۔ شبہ ظاہر کیا جا رہا ہے کہ اسے جنوبی دارفور کے دارالحکومت نیالا منتقل کر دیا گیا ہے، جو آر ایس ایف کا گڑھ سمجھا جاتا ہے۔
آدرش کے اہل خانہ نے این ڈی ٹی وی کو بتایا کہ وہ 2022 سے سوڈان میں سوکارتی پلاسٹک فیکٹری میں ملازمت کر رہے تھے۔ ان کی اہلیہ سسمیتا نے بتایا کہ ان کے دو بیٹے ہیں، جن کی عمریں آٹھ اور تین سال ہیں۔
خاندان کی جانب سے جاری ایک ویڈیو میں آدرش بہیرا ہاتھ جوڑے حکومت سے مدد کی اپیل کرتے نظر آتے ہیں۔ وہ کہتے ہیں، ”میں الفاشر میں ہوں، یہاں کے حالات بہت خراب ہیں۔ میں پچھلے دو سالوں سے بڑی مشکلات کے ساتھ زندگی گزار رہا ہوں۔ میری فیملی اور بچے بہت پریشان ہیں۔ میں اڑیسہ حکومت سے درخواست کرتا ہوں کہ میری مدد کی جائے۔“
رپورٹس کے مطابق آر ایس ایف نے 18 ماہ کے محاصرے کے بعد الفاشر پر قبضہ کر لیا ہے۔ بین الاقوامی فوجداری عدالت نے خبردار کیا ہے کہ آر ایس ایف کے اقدامات جنگی جرائم کے زمرے میں آ سکتے ہیں، کیونکہ اطلاعات کے مطابق علاقے میں عام شہریوں کے قتل اور خواتین کے ساتھ زیادتی کے واقعات پیش آئے ہیں۔
سوڈان میں بھارت کے سفیر ڈاکٹر محمد عبداللہ علی التوم نے نجی ٹی وی سے گفتگو میں کہا، ”الفاشر میں مکمل مواصلاتی نظام تباہ ہو چکا ہے، کسی سے رابطہ ممکن نہیں۔ ہم امید کرتے ہیں کہ آدرش بہیرا کو کوئی نقصان نہ پہنچے۔ حالات بہت غیر یقینی ہیں، لیکن ہم ان کی محفوظ واپسی کے لیے ہر ممکن کوشش کر رہے ہیں۔“
