افغانستان میں ایک شدید زلزلے نے تباہی مچادی، جس کے نتیجے میں کم از کم 20 افراد جاں بحق اور 300 سے زائد زخمی ہوگئے۔ حکام نے خدشہ ظاہر کیا ہے کہ ہلاکتوں میں مزید اضافہ ہوسکتا ہے۔
مقامی ذرائع کے مطابق زلزلے کے جھٹکے مزار شریف سمیت ملک کے مختلف علاقوں میں محسوس کیے گئے، جنہوں نے شہریوں میں خوف و ہراس پیدا کردیا۔ متعدد مکانات زمین بوس ہوگئے یا شدید نقصان کا شکار ہوئے، جس کے باعث درجنوں افراد ملبے تلے دب گئے۔
زلزلہ پیما مرکز کے مطابق زلزلے کی شدت 6.3 اور گہرائی 28 کلومیٹر ریکارڈ کی گئی، جب کہ اس کا مرکز صوبہ سمنگان کے ضلع خُلم سے تقریباً 22 کلومیٹر جنوب مغرب میں واقع تھا۔ زلزلے کے وقت مزار شریف میں شہری خوفزدہ ہو کر گھروں سے باہر نکل آئے اور رات گئے تک کھلے مقامات پر پناہ لیے رکھی۔
زلزلے کے جھٹکے افغانستان کے علاوہ ترکمانستان، تاجکستان، ازبکستان اور ایران میں بھی محسوس کیے گئے۔ امریکی جیولوجیکل سروے کے پیجر سسٹم نے زلزلے کے لیے نارنجی الرٹ جاری کیا، جو ظاہر کرتا ہے کہ جانی نقصان اور مالی تباہی کے امکانات خاصے زیادہ ہیں۔
ماہرین کے مطابق افغانستان جغرافیائی طور پر ایک زلزلہ خیز ملک ہے، جو دو بڑی فالٹ لائنز پر واقع ہونے کے باعث اکثر زلزلوں کی زد میں رہتا ہے۔ حالیہ برسوں میں متعدد تباہ کن زلزلوں نے ہزاروں جانیں لی ہیں، جن میں اگست 2024 اور سال 2023 کے شدید زلزلے نمایاں ہیں۔
