فرانس کے شہر لیون میں سونا صاف کرنیوالی ایک لیبارٹری پر مسلح ڈاکوؤں کے حملے نے ملک بھر میں سنسنی پھیلا دی۔
چھ مسلح افراد نے فوجی معیار کے ہتھیاروں اور دھماکہ خیز مواد کا استعمال کرتے ہوئے گولڈ ریفائننگ لیبارٹری پر حملہ کیا، جس کے دوران پانچ ملازمین زخمی ہو گئے۔
واقعہ جمعرات کی دوپہر پیش آیا، جب ڈاکوؤں نے لیبارٹریز پورکیوری (Laboratoires Pourquery) نامی نجی ادارے میں دھاوا بول دیا۔
حملہ آوروں نے بارودی مواد سے دروازہ اڑایا اور اندر گھس کر تقریباً 1 کروڑ 20 لاکھ یورو (3 ارب 92 کروڑ روپے) مالیت کا سونا لوٹ لیا۔
حکام کے مطابق 28 ملازمین اس وقت لیبارٹری میں موجود تھے۔ 3 زخمیوں کو احتیاطی طور پر اسپتال منتقل کیا گیا، تاہم ان کی حالت خطرے سے باہر ہے۔
پولیس نے فوری کارروائی کرتے ہوئے ملزمان کو پڑوسی قصبے وینیسیو (Venissieux) سے گرفتار کر لیا۔ گرفتار شدگان میں ایک خاتون ملزمہ بھی شامل ہے جو اس کارروائی میں شریک تھی۔
فرانسیسی وزیر داخلہ لوران نیونیز نے سماجی پلیٹ فارم ایکس (X) پر کہا کہ لیون میں قیمتی دھاتوں کی کمپنی پر حملہ کرنے والے 6 افراد کو رنگے ہاتھوں پکڑا گیا۔ پولیس نے شاندار تیزی، مہارت اور جرات کا مظاہرہ کیا۔
پولیس نے کارروائی کے دوران خودکار رائفلیں، ہینڈ گنز اور دھماکہ خیز مواد بھی برآمد کیا۔
یہ واقعہ ایسے وقت میں پیش آیا ہے جب فرانس میں حالیہ ہفتوں کے دوران اعلیٰ سطح کی ڈکیتیوں کی لہر دیکھی جا رہی ہے۔
رواں ماہ لوور میوزیم (Louvre Museum) سے 102 ملین ڈالر مالیت کے جواہرات چوری کیے گئے، جبکہ قدرتی تاریخ کے میوزیم سے بھی 1 ملین ڈالر کے سونے کے نمونے چرا لیے گئے تھے۔
