ٹیسٹ کرکٹ کی تاریخ میں پہلی بار چائے کا وقفہ کھانے سے پہلے دیا جائے گا، جسے ماہرین ایک غیر معمولی اور یادگار فیصلہ قرار دے رہے ہیں۔
یہ نئی ترتیب بھارت اور جنوبی افریقہ کے درمیان 22 نومبر کو گوہاٹی میں ہونے والے دوسرے ٹیسٹ میچ کے دوران آزمائی جائے گی۔
بھارتی میڈیا کی رپورٹ کے مطابق، یہ تبدیلی مشرقی بھارت میں سورج کے جلد طلوع اور غروب ہونے کے باعث کی گئی ہے، کیونکہ گوہاٹی میں دن کا آغاز دیگر بھارتی شہروں کی نسبت جلد ہوتا ہے۔
اس فیصلے کا بنیادی مقصد یہ ہے کہ دن کے تمام 90 اوورز قدرتی روشنی میں مکمل کیے جا سکیں۔
نئے شیڈول کے مطابق میچ صبح 9 بجے شروع ہوگا، جو کہ پہلے سے 30 منٹ پہلے کا وقت ہے۔
پہلا سیشن 9 سے 11 بجے تک جاری رہے گا، جس کے بعد 11 سے 11:20 تک چائے کا وقفہ دیا جائے گا۔
دوسرا سیشن 11:20 سے 1:20 تک کھیلا جائے گا، اور پھر 2 بجے تک کھانے کا وقفہ ہوگا۔
تیسرا سیشن 2 سے 4 بجے تک جاری رہے گا، تاکہ کھیل غروبِ آفتاب سے قبل مکمل کیا جا سکے۔
یہ نیا نظام بھارتی اور جنوبی افریقی کرکٹ بورڈز کی باہمی مشاورت سے طے پایا ہے، تاکہ گوہاٹی کے مقامی موسم اور روشنی کے حالات کو مدِنظر رکھتے ہوئے میچ کا تسلسل برقرار رکھا جا سکے۔
