شہر قائد میں ای چالان کے دوسرے دن چوبیس گھنٹوں کے دوران مزید 4 ہزار 301 شہریوں کے چالان کیے گئے۔
اے آر وائی نیوز کے مطابق ای چالان کے آغاز کے بعد گزشتہ روز دوسرا دن تھا، جس میں مکمل 24 گھنٹوں کی مانیٹرنگ رپورٹ سامنے آ گئی ہے، اس دوران ٹریفک قوانین کی مختلف خلاف ورزیوں پر 4 ہزار 301 شہریوں کے چالان کیے گئے۔
رپورٹ کے مطابق سب سے زیادہ چالان سیٹ بیلٹ کی خلاف ورزی پر کیے گئے جو 2 ہزار 290 ہیں، اس کے بعد تیز رفتاری سے ڈرائیونگ پر 845، بغیر ہیلمٹ 655، لال سگنل جمپ کرنے پر 306، دوران ڈرائیونگ موبائل فون استعمال کرنے پر 162 چالان کیے گئے۔
رپورٹ کے مطابق غیر قانونی پارکنگ پر 15، ون وے اسٹریٹ پر رانگ وے آنے پر 16 اور اوور لوڈنگ پر 4 چالان کیے گئے، شہری اکثر سگنل پر اسٹاپ لائن سے آگے کھڑے ہو جاتے ہیں، جس کی خلاف ورزی پر 6 چالان، رانگ وے آنے پر 33 اور کالے شیشوں کی خلاف ورزی پر 30 چالان کیے گئے۔
ڈی آئی جی ٹریفک پیر محمد شاہ کے مطابق بغیر لائسنس موٹر سائیکل چلانے پر 20 ہزار کا چالان ہوگا، تمام شہری اپنے ڈرائیونگ لائسنس اپڈیٹ رکھیں، ٹریفک قوانین کی خلاف ورزی پر اب کسی کو چھوٹ نہیں دی جائے گی، تمام چھوٹی بڑی گاڑیوں کی اسپیڈ لمٹ صرف 60 ہے، اسپیڈ سے زیادہ چلانے پر اوور اسپیڈنگ کا ٹکٹ جاری ہوگا۔
ٹریفک پولیس حکام کے مطابق گزشتہ روز پہلا دن تھا، جب مکمل طور پر 24 گھنٹے سسٹم چلایا گیا، اب ای چالاننگ سسٹم باقاعدہ طور پر فعال کر دیا گیا ہے، ٹریفک پولیس حکام کے مطابق سسٹم کا مقصد چالان کرنا نہیں بلکہ قوانین پر عمل درآمد کروانا ہے۔ شہریوں سے اپیل ہے کہ ٹریفک قوانین کی مکمل پاس داری کریں تاکہ شہر میں ٹریفک کا نظام بہتر ہو اور حادثات میں کمی لائی جا سکے۔
