این بی پی کی جانب سے بریسٹ کینسر سے آگاہی کے لیے "اننگز آف اویئرنیس" کرکٹ میچ کا انعقاد

کراچی

مور خہ 26اکتوبر 2025

پریس ریلیز

این بی پی کی جانب سے بریسٹ کینسر سے آگاہی کے لیے “اننگز آف اویئرنیس” کرکٹ میچ کا انعقاد

کراچی 26 اکتوبر۔نیشنل بینک آف پاکستان (این بی پی) نے اپنی سماجی ذمے داری اور ملازمین کی فلاح و بہبود کے عزم کے تحت پنک ٹوبر 2025 مہم کے سلسلے میں ایک علامتی کرکٹ میچ “اننگز آف اویئرنیس” کے عنوان سے منعقد کیا، جس کا مقصد بریسٹ کینسر سے متعلق آگاہی کو فروغ دینا تھا۔

یہ میچ این بی پی اسپورٹس کمپلیکس میں کھیلا گیا، جس میں مختلف شعبہ جات کے ملازمین نے شرکت کی۔ اس موقع پر شرکاء نے نہ صرف کھیل کا لطف اٹھایا بلکہ ایک ایسے مقصد کے لیے متحد ہوئے جو لاکھوں زندگیوں سے جڑا ہے ۔اس میچ کا مقصد بریسٹ کینسر کے خلاف جدوجہدکرنے والی خواتین کے ساتھ اظہارِ یکجہتی ،بروقت تشخیص اور آگاہی کی اہمیت کو اجاگر کرنا تھا۔

صدر این بی پی، رحمت علی حسنی نے کہا،”یہ میچ محض ایک کھیل نہیں بلکہ یاد دہانی ہے کہ آگاہی پیدا کرنا ہم سب کی مشترکہ ذمہ داری ہے۔ این بی پی میں ہم سمجھتے ہیں کہ آگاہی ہمدردی اور عمل سے جنم لیتی ہے، اور ہر فرد، خواہ مرد ہو یا خاتون، صحت، مدد اور بروقت تشخیص کو فروغ دینے میں کردار ادا کر سکتا ہے۔”

اعداد و شمار کے مطابق پاکستان ایشیا میں بریسٹ کینسر کے سب سے زیادہ کیسز والا ملک ہے، جہاں ہر نو میں سے ایک خاتون اس مرض کے خطرے سے دوچار ہے جبکہ ہر سال تقریباً 40 ہزار خواتین تاخیر سے تشخیص کے باعث اپنی جان گنوا دیتی ہیں۔ اس پس منظر میں این بی پی کی پنک ٹوبر مہم کا مقصد آگاہی، اسکریننگ اور ہمدردی کو فروغ دینا ہے تاکہ نہ صرف ادارے کے اندر بلکہ معاشرے میں بھی مثبت تبدیلی لائی جا سکے۔

میچ میں شریک کھلاڑیوں نے خصوصی گلابی آرم بینڈ کے ساتھ کھیل میں حصہ لیا، جبکہ نمایاں کارکردگی دکھانے والے کھلاڑیوں اور منتظمین کو میڈلز اور شیلڈز سے نوازا گیا۔

یہ سرگرمی این بی پی کی ماہ اکتوبر کے دوران جاری مختلف تقریبات کا حصہ ہے، جن میں بریسٹ کینسر سے متعلق حقائق اور غلط فہمیوں پر مبنی آگاہی مواد، بروقت تشخیص کی معلومات، ملک گیر آگاہی سیشنز اور صحت مند طرز زندگی اپنانے سے متعلق پیغامات شامل ہیں۔ اس مہم میں ایک خاتون سروائیور کی کہانی بھی شیئر کی گئی، جس نے شرکاء کو حوصلہ اور امید کا پیغام دیا۔