بیگم نصرت بھٹو کی یاد میں

تحریر: سہیل دانش
اُنہیں یاد کرتے ہوئے نہ جانے کتنے مناظر آنکھوں میں گردش کررہے ہیں وہ نہ جانے کتنے ادھورے خواب اپنی آنکھوں میں سجائے اِس دنیا سے رخصت ہوگئی تھیں یہ کیسی عروج اور آزمائشوں کی داستان ہے۔ اُن قوتوں سے ٹکرانے کی کہانی جو اُنکی سیاسی قوت اور عوامی طاقت سے خوفزدہ تھیں۔ خوش پوش خوش گفتار اور ہنستے مسکراتے چہرے کے ساتھ صدارتی محل اور وزیراعظم ہاؤس میں خاتون اول کی حیثیت سے انمٹ یادیں بکھیرنے والی نصرت بھٹو جو 1950 کی دہائی میں خوش بختی کا

انعام لے کر بیرسٹر ذوالفقار علی کی لائف پارٹنر بنی تھیں۔ وہی بھٹو جو پاکستان کی سیاسی تاریخ کے متحرک، اور مقبول کردار کی حیثیت سے ایک انوکھی تاریخ رقم کرگئے اُن کا ہاتھ تھامتے ہوئے نصرت بھٹو ے شاید سوچا بھی نہیں ہوگا

کہ عروج شہرت اور نازو نخروں میں جوانی کے ماہ و سال گزارنے کے بعد اُنہیں غم کے کتنے جنگلوں سے گزرنا پڑے گا دُکھوں کے کتنے صحرا عبور کرنے ہوں گے خون کے کتنے دریا پھلانگنے پڑیں گے اپنے شوہر کو

موت کی کال کوٹھری میں مقید دیکھنے کے بعد پھانسی کے پھندے پر جھولتے دیکھا جو ملک کے پہلے منتخب وزیراعظم بنے تھے۔ ایسا لگتا ہے بھٹو صاحب بہت جلدی میں تھے 1927 میں آئے تھے اور 1979 میں چلے گئے

بعد میں نصرت بھٹو کو اپنے شوہر کی سرگرم اور مقبول پارٹی ورثے میں ملی تھی اور انہوں نے اپنی کڑی مشکلات سے پُرجمہوری جدوجہد سے خود کو منوایا۔ اپنے سامنے دونوں بیٹوں کو موت کی وادی میں اُترتے دیکھا۔

زندگی کے مشکل لمحات میں اُن کے چہرے پر دوبار شگفتگی اور دلآویز مسکراہٹ دیکھنے کو ملی جب وہ بیٹی کا ہاتھ آصف زرداری کو تھمارہی تھیں اور دوسری بار جب وہ لیڈی ڈفرن ہسپتال کراچی میں

اپنے نواسے کی دنیا میں آمد کی خوشخبری سنارہی تھیں۔ جب بے نظیر دہشت گرد حملے میں شہید ہوئیں تو محترمہ نصرت بھٹو کوما کی حالت میں تھیں۔ یہ بڑی طویل کہانی ہے۔ ناہید اسکندر مرزا کی دوستی سے لے کر بھٹو صاحب کی 1958 کی کابینہ میں شمولیت، اختیار اقتدار شہرت، آزمائش، جدوجہد نصرت بھٹو نے زندگی میں سب کچھ دیکھا۔ کہانی کے اوراق پلٹتے جائیں جو یہی بتاتے ہیں جانے والے اپنے ساتھ بہت کچھ لے جاتے ہیں اپنی قوتِ ارادی، اپنا عزم، اپنی فیم، اپنی دانش، اپنا تدبر، اپنی جرات، اپنے دُکھ درد، اپنے خواب لیکن ایک سبق ضرور چھوڑجاتے ہیں کہ وہ یاد رکھنے کے قابل ہیں۔ اللہ تعالیٰ مرحومہ کی مغفرت فرمائے۔ آمین۔