سڈنی میں سیریز کے آخری میچ میں بھارت نے شاندار کم بیک کرتے ہوئے آسٹریلیا کو 9 وکٹوں سے شکست دے کر وائٹ واش ہونے سے بچا لیا۔ آسٹریلوی ٹیم 236 رنز بنا کر آؤٹ ہوگئی، جس میں مچل مارش نے 41، میٹ رینشا نے 56 اور میتھیو شارٹ نے 30 رنز اسکور کیے۔ بھارت کی جانب سے ہرشیت رانا نے بہترین بولنگ کرتے ہوئے 4 وکٹیں حاصل کیں۔
رن چیس میں بھارت نے صرف ایک وکٹ کے نقصان پر 38.3 اوورز میں ہدف حاصل کر لیا۔ شبمن گل 24 رنز بنا کر آؤٹ ہوئے، مگر آج بھارتی کرکٹ کی مشہور جوڑی روہت شرما اور ویرات کوہلی مکمل فارم میں نظر آئی۔
روہت شرما نے اپنی 33ویں ون ڈے سنچری مکمل کرتے ہوئے 121 رنز ناٹ آؤٹ بنائے، جن میں 13 چوکے اور 3 چھکے شامل تھے، جبکہ ویرات کوہلی نے بھی شاندار بیٹنگ کا مظاہرہ کرتے ہوئے 74 رنز ناٹ آؤٹ بنائے، جن میں 7 چوکے شامل تھے۔
