میڈیکل،ڈینٹل گریجویٹس کے لیے ایک ماہ کا انٹرن شپ پروگرام
انٹرشپ پروگرام یکم دسمبر سے31دسمبرتک جاری رہے گا، بین الاقوامی مرکز جامعہ کراچی کا اعلان
ایک ماہ کایہ انٹر شپ پروگرام ڈاکٹر پنجوانی سینٹر جامعہ کراچی کے تحت اس کے ذیلی اداروں میں ہوگا
کراچی – ڈاکٹر پنجوانی سینٹر برائے مالیکیولر میڈیسن اینڈ ڈرگ ریسرچ(پی سی ایم ڈی)، جامعہ کراچی نے میڈیکل اور ڈینٹل کے حالیہ گریجویٹس اور طلبہ کے لیے ایک ماہ پر مشتمل خصوصی انٹرن شپ پروگرام کا اعلان کیا ہے، جو یکم دسمبر سے31دسمبر2025تک جاری رہے گا۔
یہ بات ایک اجلاس میں بتائی گئی جس کی صدارت بین الاقوامی مرکز برائے کیمیائی و حیاتیاتی علوم (آئی سی سی بی ایس) جامعہ کراچی کے ڈائریکٹر پروفیسر ڈاکٹر محمد رضا شاہ نے کی۔ اجلاس کو آگاہ کیا گیا کہ اس پروگرام کا مقصد شرکاء کو مالیکیولر اور سیلولر سطح پر تحقیقی سرگرمیوں میں شامل ہونے کا موقع فراہم کرنا ہے تاکہ وہ کلینیکی طور پر متعلقہ تحقیق کرنے، تحقیقاتی سوالات مرتب کرنے، مناسب تحقیقی طریقے اپنانے، اور نتائج کا تنقیدی تجزیہ کرنے کی ابتدائی مہارت حاصل کرسکیں۔ پروفیسر رضا شاہ کو بتایا گیا کہ انٹرنز کو آئی سی سی بی ایس کے چھ مراکز میں تربیت دی جائے گی، جن میں ڈاکٹر پنجوانی سینٹر برائے مالیکیولر میڈیسن اینڈ ڈرگ ریسرچ، فارماسیوٹیکل ٹیسٹنگ لیبارٹریز، جمیل الرحمٰن سینٹر برائے جینومکس، نیشنل انسٹی ٹیوٹ آف وائرالوجی، سائنوپاکستان ٹریڈیشنل میڈیسن ریسرچ سینٹر، اور سینٹر فار بایو ایکویویلینس اسٹڈیز اینڈ کلینیکل ریسرچ شامل ہیں، ان مراکز کو صوبائی وزیرِ صحت و بہبودِ آبادی کی جانب سے سندھ حکومت ہیلتھ کیئر ریسرچ سینٹرز قرار دیا گیا ہے۔
اجلا س میں یہ بھی بتایا گیا کہ کامیاب امیدواروں کو11سائنسی شعبہ جات میں تربیت دی جائے گی، جن میں بایو انفارمیٹکس اینڈ کمپیوٹیشنل کیمسٹری، بایو ایکویویلینس اسٹڈیز، جینومکس، امیونولوجی، مائیکروبایولوجی، مالیکیولر بایولوجی، فارماکولوجی، پروٹیومکس، اسٹیم سیل ریسرچ، اسٹرکچرل بایولوجی، اور وائرالوجی شامل ہیں۔ منتخب امیدواروں کو پی سی ایم ڈی کے مختلف شعبہ جات میں چار ہفتوں کے لیے تعینات کیا جائے گا۔ یہ بھی واضح کیا گیا کہ منتخب انٹرنز کو کسی قسم کی مالی ادائیگی یا وظیفہ نہیں دیا جائے گا۔ایم بی بی ایس یا بی ڈی ایس پروگرامز کے گریجویٹس یا طلبہ و طالبات اپنی دلچسپی کے شعبے کے لیے گزشتہ سال(2024)کی مارکس شیٹ یا مارکس پروفارمے،شعبے کے سربراہ کی جانب سے جاری کردہ سفارش نامہ،اور سی وی کے ساتھ نیچے دیے گئے ای میل ایڈریس پر 2نومبر2025تک جمع کروا سکتے ہیں۔
iccbsinternship@gmail.com
میڈیا ایڈوائزر
===================
جامعہ کراچی میں بی ایس فرسٹ ایئر (صبح کے پروگرام) کے مختلف شعبہ جات اور ڈاکٹر آف فارمیسی (صبح و شام کے پروگرامز) کے داخلہ ٹیسٹ برائے تعلیمی سال 2026 ء ہفتہ 25اکتوبر2025ء کو صبح00 :11بجےمنعقدہوں گے۔
داخلہ ٹیسٹ میں کل 7,479 امیدوار شریک ہوں گے۔داخلہ ٹیسٹ کے لئے جامعہ کراچی کے مختلف شعبہ جات میں 22 امتحانی مراکزقائم کئے گئے ہیں۔
