بیٹی کے خواب دیکھنے اور انہیں حقیقت کا روپ دینے میں والد کا کردار کیا ہوتا ہے، یہ شاید وہی لڑکیاں بہتر جانتی ہیں جن کے خواب اکثر اس سوچ کے نیچے دب جاتے ہیں کہ “لوگ کیا کہیں گے؟” یا “لڑکیاں تو یہ سب نہیں کرتیں۔”
مگر بھارت کی ریاست چھتیس گڑھ کے ضلع جشپور سے ایک ایسی کہانی سامنے آئی ہے جس نے سب کے دلوں کو چھو لیا۔ یہاں کے ایک عام کسان بجرنگ رام نے محدود وسائل کے باوجود اپنی بیٹی چمپا بھاگت کے خواب کو سچ کر دکھایا۔
چمپا کو ایک اسکوٹی چاہیے تھی، جس کی قیمت تقریباً ایک لاکھ بھارتی روپے تھی۔ بجرنگ رام نے بیٹی کی خواہش پوری کرنے کے لیے روزانہ چند سکے جمع کرنے کا سلسلہ شروع کیا۔ یہ معمول چھ ماہ تک جاری رہا، اور جب رقم پوری ہوگئی تو وہ دھن تیرس کے دن سکوں سے بھری بوری لے کر ہونڈا شو روم پہنچے۔
شو روم کا عملہ ابتدا میں حیران رہ گیا، لیکن جب انہیں باپ کے خلوص اور بیٹی کے خواب کی کہانی معلوم ہوئی تو سب نے کسان کے جذبے کو سراہا۔
چمپا بھاگت کے لیے وہ اسکوٹی صرف ایک سواری نہیں تھی — بلکہ باپ کی محبت، یقین اور محنت کی علامت بن گئی۔ یہ دل کو چھو لینے والی کہانی ایک ویڈیو کے ذریعے منظرِ عام پر آئی، جو سوشل میڈیا پر تیزی سے وائرل ہو گئی۔
