مائیکروسافٹ نے اپنا پہلا مصنوعی ذہانت پر مبنی ان ہاؤس اے آئی امیج جنریٹر، MAI-Image-1 لانچ کر دیا ہے، یہ نیا ماڈل فوٹو ریئلسٹک تصاویر بنانے کی صلاحیت رکھتا ہے۔
مائیکروسافٹ نے اپنا پہلا مصنوعی ذہانت پر مبنی امیج جنریٹر MAI-Image-1 لانچ کردیا ہے، جس کے بارے میں کمپنی کا دعویٰ ہے کہ یہ نہ صرف تیز تر ہے بلکہ دیگر معروف اے آئی ماڈلز کے مقابلے میں اعلیٰ معیار کی تصاویر تیار کرتا ہے۔ یہ اقدام مائیکروسافٹ کی اوپن اے آئی پر انحصار کم کرنے کی حکمت عملی کا حصہ ہے۔
کمپنی کے مطابق، MAI-Image-1 فوٹو ریئلسٹک تصاویر بنانے کی صلاحیت رکھتا ہے جو روشنی، عکاسی اور قدرتی مناظر کو شاندار انداز میں پیش کرتی ہیں۔ ماڈل کی تیاری میں پیشہ ور فوٹوگرافرز اور ڈیزائنرز سے فیڈبیک لیا گیا تاکہ تصاویر زیادہ قدرتی اور متاثر کن ہوں، نہ کہ روایتی اے آئی سے تیار کردہ عمومی تصاویر۔
مائیکروسافٹ کا کہنا ہے کہ MAI-Image-1 نہ صرف تیزی سے نتائج فراہم کرتا ہے بلکہ دیگر بڑے ماڈلز سے زیادہ مؤثر بھی ہے۔ یہ ماڈل عالمی سطح پر معروف اے آئی بینچ مارک پلیٹ فارم ’ایل ایم ارینا‘ پر ٹاپ 10 ماڈلز میں شامل ہوچکا ہے، جہاں صارفین تصاویر کا موازنہ کرکے بہترین ماڈل کا انتخاب کرتے ہیں۔
ادھر، اے آئی امیجنگ کے میدان میں اوپن اے آئی اور گوگل مضبوط حریف ہیں۔ اوپن اے آئی نے حال ہی میں اپنا ’سورا ایپ‘ ایپل ایپ اسٹور پر (امریکہ اور کینیڈا میں) متعارف کرایا ہے، جو صارفین کو ویڈیوز بنانے اور شیئر کرنے کی سہولت دیتا ہے۔ دوسری جانب، گوگل کا ’نینو بنانا‘ امیج ماڈل سوشل میڈیا پر، خصوصاً پاکستان اور بھارت میں، تخلیقی رجحانات کے ساتھ مقبولیت حاصل کر رہا ہے۔
ایسے میں مائیکروسافٹ کا MAI-Image-1 کا لانچ کمپنی کے لیے خود مختاری کی جانب ایک اہم قدم ہے، جو اسے اے آئی امیجنگ کے مسابقتی میدان میں ایک مضبوط کھلاڑی کے طور پر پیش کرتا ہے۔
