جامعہ کراچی کے پوائنٹ بس کی زد میں آکر جاں بحق ہونے والی طالبہ کے اندوہناک واقعے نے جامعہ کی فضا کو سوگوار کردیا
وائس چانسلر پروفیسر ڈاکٹر خالد محمود عراقی نے متاثرہ خاندان کے گھر جا کر ذاتی طور پر تعزیت کی اور جامعہ کی جانب سے بھرپور تعاون کا یقین دلایا
وائس چانسلر کی جانب سے واقعے کی شفاف تحقیقات کے لئے چاررکنی کمیٹی تشکیل اورپوائنٹ بس کا ڈرائیور معطل
جامعہ کراچی کے کیمپس میں جمعہ کےروز ایک افسوسناک حادثہ پیش آیا، جس کے نتیجے میں شعبہ سماجی بہبود کی سال دوم کی طالبہ، جامعہ کی پوائنٹ بس کی زد میں آکر جاں بحق ہوگئیں اور اس اندوہناک واقعے نے جامعہ کی فضا کو سوگوار کر دیا ۔
وائس چانسلر جامعہ کراچی، پروفیسر ڈاکٹر خالد محمود عراقی نے واقعے کی اطلاع ملتے ہی کیمپس سیکیورٹی ایڈوائزر اور قائم مقام مشیر امور طلبہ کو فوری طور پر ڈاؤ یونیورسٹی اسپتال روانہ کیا اور متاثرہ طالبہ کے لواحقین سے فوری رابطہ قائم کرنے کی ہدایت جاری کی۔
جامعہ کراچی کی انتظامیہ نے مرحومہ کے خاندان سے گہرے دکھ اور افسوس کا اظہار کرتے ہوئے ہر ممکن تعاون کی یقین دہانی کرائی ہے۔ وائس چانسلر نے واقعے کی شفاف تحقیقات کے لیے فوری اقدامات اٹھاتے ہوئے پوائنٹ بس کے ڈرائیور کو معطل کر دیا ہے اور ایک چار رکنی تحقیقاتی کمیٹی تشکیل دی ہے۔
اس کمیٹی کی سربراہی صدر شعبہ جرمیات، پروفیسر ڈاکٹر ناعمہ سعید کو سونپی گئی ہے، جبکہ دیگر اراکین میں جامعہ این ای ڈی کے ٹرانسپورٹ انچارج اور شعبہ سماجی بہبود کے دو طلبہ شامل ہیں۔ کمیٹی حادثے کے تمام پہلوؤں کا باریک بینی سے جائزہ لے کر اپنی رپورٹ وائس چانسلر کو پیش کرے گی، جس کی روشنی میں آئندہ ایسے ناگہانی واقعات کی روک تھام کے لیے مؤثر اقدامات کیے جائیں گے۔
وائس چانسلر، پروفیسر ڈاکٹر خالد محمود عراقی نے متاثرہ خاندان کے گھر جا کر ذاتی طور پر تعزیت کی اور جامعہ کی جانب سے بھرپور تعاون کا یقین دلایا۔
جامعہ کراچی اس دکھ کی گھڑی میں لواحقین کے ساتھ کھڑی ہے اور طالبہ کی ناگہانی موت پر گہرے رنج و غم کا اظہارکرتی ہے۔
