لاہور:نائب وزیر اعظم سینیٹر محمد اسحاق ڈار کی داتاؒ دربار آمد، سیکرٹری اوقاف نے استقبال کیا۔انہوں نے مزار شریف پر حاضری دی اور فاتحہ خوانی و دُعا کی۔
سیکرٹری اوقاف ڈاکٹر طاہر رضابخاری نے مزار شریف پر جاری ترقیاتی امورکے متعلق بریفنگ دی۔ داتاؒ دربارپراجیکٹ کے فنشنگ ورک کے سلسلے میں اوقاف، نیسپاک،مدینہ فاؤنڈیشن کے انجینئرز نے تفصیلا ت سے آگاہ کیا۔
نائب وزیر اعظم نے مزار شریف کے سُپر سٹرکچر کی تشکیل کے بعد ماربل کی کوالٹی اور ڈیزائن کا حتمی انتخاب کیا۔مزار شریف کے مرکزی گنبدکی ٹائلز کا کلر گرین، جبکہ مزار شریف زیارت وائٹ ماربل سے مزین ہوگا۔
سینیٹر محمد اسحاق ڈار کومزار کی دیواروں پر خطاطی، کیلی گرافی، قرآنی آیا ت، احادیث اور داتاؒ صاحب کے اقوال کے انتخاب سے آگاہ کیا گیا۔ انہوں نے جدید ایئر کنڈیشننگ سسٹم اور ایڈ وانسڈ الیکٹریکل ایکیوپمنٹ کی تنصیب اور اعلیٰ خطاطی و کیلی گرافی کے امور کا جائزہ لیا۔
نائب وزیراعظم نے کہاکہ دربار کی تعمیر ِ نوسے زائرین کیلئے گنجائش میں تین گناہ اضافہ ہوا۔ داتاؒ دربار تعمیراتی منصوبہ عہد ساز اور تاریخی نوعیت کا حامل ہے۔ عہد ِ حاضر میں حضرت داتا ؒ صاحب کی تعلیمات سے استفادہ وقت کی اہم ضرورت ہے۔
