پاکستان ٹی ٹوئنٹی ٹیم کے کپتان سلمان علی آغا اور ہیڈ کوچ مائیک ہیسن کے درمیان جنوبی افریقہ کے خلاف آئندہ ٹی ٹوئنٹی سیریز اور آئی سی سی ٹی ٹوئنٹی ورلڈکپ کی تیاریوں کے حوالے سے اہم ملاقات ہوئی ہے۔
ذرائع کے مطابق کپتان اور کوچ عالمی ایونٹ کو مدنظر رکھتے ہوئے قومی ٹیم کے کمبی نیشن کو مضبوط اور مستحکم بنانے کے خواہش مند ہیں۔ ٹیم مینجمنٹ کے تھنک ٹینک اور سلیکشن کمیٹی کے درمیان جلد مشاورت متوقع ہے، جبکہ امکان ظاہر کیا جا رہا ہے کہ جنوبی افریقہ کے خلاف ٹیسٹ سیریز کے دوران وائٹ بال اسکواڈ کا تربیتی کیمپ لگایا جائے گا، جس کے لیے ممکنہ کھلاڑیوں کے نام جلد سامنے آئیں گے۔
ابتدائی اطلاعات کے مطابق سابق کپتانوں بابر اعظم اور وکٹ کیپر محمد رضوان کی ٹی ٹوئنٹی اسکواڈ میں واپسی کے امکانات نہ ہونے کے برابر ہیں۔ موجودہ کپتان سلمان علی آغا، جن پر بورڈ اور ٹیم مینجمنٹ کو مکمل اعتماد حاصل ہے، ممکنہ طور پر جنوبی افریقہ سیریز میں نمبر تین پر بیٹنگ کریں گے۔
دائیں ہاتھ کے بلے باز سلمان علی آغا نے 32 ٹی ٹوئنٹی میچوں میں 561 رنز بنائے ہیں جن کا اسٹرائیک ریٹ 110.21 رہا۔ تاہم ایشیا کپ میں صرف 72 رنز بنانے پر انہیں تنقید کا سامنا کرنا پڑا۔ اس کے باوجود، کوچ مائیک ہیسن اور پی سی بی انتظامیہ آئی سی سی ٹی ٹوئنٹی ورلڈکپ سے قبل قیادت میں کوئی تبدیلی کرنے کے حق میں نہیں ہیں۔
دوسری جانب، ذرائع کے مطابق نوجوان بلے باز صائم ایوب، جو ایشیا کپ میں سات اننگز میں چار مرتبہ صفر پر آؤٹ ہوئے اور بعد میں ٹیسٹ اسکواڈ سے ڈراپ کیے گئے، وائٹ بال کرکٹ کے لیے ٹیم مینجمنٹ کا اعتماد برقرار رکھے ہوئے ہیں۔ وکٹ کیپر محمد حارث کی پوزیشن بھی فی الحال محفوظ ہے، تاہم فاسٹ بولنگ شعبے میں حارث رؤف کی جگہ دیگر پیسرز کو موقع دینے پر اتفاق کیا گیا ہے۔
ذرائع کا کہنا ہے کہ اگرچہ کپتان سلمان علی آغا اور کوچ مائیک ہیسن ایشیا کپ فائنل میں شکست سے مایوس ہیں، تاہم وہ موجودہ اسکواڈ کو تسلسل کے ساتھ موقع دینے کے حامی ہیں۔ اسی لیے امکان ہے کہ جنوبی افریقہ کے خلاف ٹی ٹوئنٹی سیریز کے لیے بابر اعظم اور محمد رضوان کو اسکواڈ میں شامل نہیں کیا جائے گا۔
