کرکٹ کی دنیا کے سب سے پرجوش مقابلے، ایشز سیریز کا 74واں ایڈیشن اس سال نومبر میں آسٹریلیا میں شروع ہوگا، جس میں آسٹریلیا اور انگلینڈ کی ٹیمیں ایک بار پھر روایتی ٹیسٹ معرکے میں آمنے سامنے ہوں گی۔
بین الاقوامی کرکٹ کونسل (آئی سی سی) نے 2025/26 ایشز سیریز کا مکمل شیڈول اور وینیوز جاری کر دیے ہیں۔ پانچ ٹیسٹ میچوں پر مشتمل یہ سیریز 21 نومبر سے 8 جنوری 2026 تک جاری رہے گی۔
سیریز کا پہلا ٹیسٹ میچ 21 سے 25 نومبر تک پرتھ اسٹیڈیم (جسے آپٹس اسٹیڈیم بھی کہا جاتا ہے) میں کھیلا جائے گا۔ یہ پہلا موقع ہوگا جب پرتھ اسٹیڈیم ایشز ٹیسٹ کی میزبانی کرے گا، جو اس شہر میں ایشز کرکٹ کی واپسی کی علامت بھی بنے گا۔
دوسرا ٹیسٹ 4 سے 8 دسمبر تک گابا، برسبین میں، تیسرا ٹیسٹ 17 سے 21 دسمبر تک ایڈیلیڈ اوول میں، جب کہ روایتی باکسنگ ڈے ٹیسٹ 26 سے 30 دسمبر تک میلبورن کرکٹ گراؤنڈ (ایم سی جی) میں کھیلا جائے گا۔ سیریز کا پانچواں اور آخری ٹیسٹ 4 سے 8 جنوری 2026 تک سڈنی کرکٹ گراؤنڈ میں منعقد ہوگا۔
یہ بھی قابل ذکر ہے کہ 1982/83 کے بعد یہ پہلا موقع ہوگا جب آسٹریلیا میں ایشز سیریز کی شروعات برسبین کے میدان سے نہیں بلکہ پرتھ سے ہو رہی ہے۔
تاریخی طور پر، دونوں ٹیموں کے درمیان اب تک 73 ایشز سیریز کھیلی جا چکی ہیں جن میں آسٹریلیا نے 34 اور انگلینڈ نے 32 سیریز جیت رکھی ہیں، جبکہ 7 سیریز بغیر نتیجے کے ختم ہوئیں۔
گزشتہ 2023 کی ایشز سیریز 2-2 سے برابر رہی تھی، جس نے دونوں ٹیموں کے درمیان مسابقت کو مزید بڑھا دیا۔
یہ نیا ایڈیشن نہ صرف ایشز کی روایت کو تازہ کرے گا بلکہ ورلڈ ٹیسٹ چیمپئن شپ 2025/27 کے پوائنٹس ٹیبل کے لیے بھی اہم ثابت ہوگا۔
