پاکستان کے تیز گیند باز حارث رؤف نے ٹی ٹوئنٹی کرکٹ کے ملٹی نیشنل مقابلوں میں شاندار کارکردگی کا مظاہرہ کرتے ہوئے ایک اہم سنگ میل عبور کر لیا۔ وہ اس طرز کے ٹورنامنٹس میں 50 وکٹیں حاصل کرنے والے پہلے پاکستانی باؤلر بن گئے ہیں۔
یہ اعزاز انہوں نے ایشیا کپ 2025ء کے سپر فور مرحلے میں بنگلہ دیش کے خلاف میچ کے دوران حاصل کیا، جہاں انہوں نے اپنے چار اوورز میں تین کھلاڑیوں کو پویلین کی راہ دکھائی۔
حارث نے یہ کارنامہ صرف 32 میچوں میں انجام دیا۔ اس فہرست میں دوسرے نمبر پر پاکستان کے سابق کپتان شاہد آفریدی ہیں جنہوں نے 43 میچز میں 47 شکار کیے۔ عمر گل 29 میچوں میں 42 وکٹوں کے ساتھ تیسرے جبکہ شاہین شاہ آفریدی 29 میچز میں 40 وکٹوں کے ساتھ چوتھے نمبر پر ہیں۔
خیال رہے کہ اسی میچ میں پاکستان نے بنگلہ دیش کو 11 رنز سے شکست دے کر فائنل کے لیے کوالیفائی بھی کر لیا۔
