پاکستان کے بائیں ہاتھ کے نوجوان بلے باز صائم ایوب نے دبئی انٹرنیشنل کرکٹ اسٹیڈیم میں جمعرات کو اے سی سی مینز ٹی ٹوئنٹی ایشیا کپ 2025ء کے سپر فور مرحلے میں بنگلہ دیش کے خلاف کھیلتے ہوئے ایک اور مایوس کن کارنامہ انجام دے ڈالا۔ وہ صرف تین گیندوں کا سامنا کرنے کے بعد بغیر کوئی رن بنائے آؤٹ ہوگئے۔
23 سالہ کھلاڑی اس سے قبل بھی ٹورنامنٹ کے گروپ مرحلے میں عمان، روایتی حریف بھارت اور متحدہ عرب امارات کے خلاف مسلسل صفر پر پویلین لوٹ چکے تھے۔ تاہم وہ اپنی فارم واپس حاصل کرنے میں ناکام رہے۔
بنگلہ دیش کے بولر مہدی حسن نے انہیں اننگز کے دوسرے اوور کی چوتھی گیند پر شکار بنایا۔ یہ صائم ایوب کا ایشیا کپ 2025ء میں چوتھا اور مجموعی طور پر ٹی ٹوئنٹی کرکٹ میں نواں صفر تھا، جس کے بعد انہوں نے سابق کپتان شاہد آفریدی کو صفر پر آؤٹ ہونے کے ریکارڈ میں پیچھے چھوڑ دیا۔ سب سے زیادہ صفر کی فہرست میں عمر اکمل بدستور سرفہرست ہیں۔
بابر اعظم، محمد حفیظ اور کامران اکمل سات، سات بار صفر پر آؤٹ ہوکر مشترکہ طور پر چوتھی پوزیشن پر ہیں۔
پاکستان کے لیے ٹی ٹوئنٹی میں سب سے زیادہ صفر
عمر اکمل: 84 میچوں میں 10
صائم ایوب: 47 میچوں میں 9
شاہد آفریدی: 98 میچوں میں 8
کامران اکمل: 58 میچوں میں 7
محمد حفیظ: 119 میچوں میں 7
بابر اعظم: 128 میچوں میں 7
یاد رہے کہ اس ٹورنامنٹ کے دوران صائم ایوب لگاتار تین صفر بنانے والے مردوں کے ٹی ٹوئنٹی کرکٹ کے 62 ویں بلے باز بھی بن گئے تھے۔ اس فہرست میں ان کا نام محمد حفیظ اور عبداللہ شفیق کے ساتھ درج ہے۔ جبکہ عبداللہ شفیق مسلسل چار صفر کے ساتھ بدترین ریکارڈ کے مالک ہیں۔
