خالد عراقی سرخرو
وائس چانسلر خالد عراقی کی تعیناتی درست قرار، مونس احمد کی پٹیشن دو سال بعد خارج
24 ستمبر ، 2025FacebookTwitterWhatsapp
کراچی ( محمد منصف ) سندھ ہائی کورٹ کے جسٹس کے کے آغا کی سربراہی میں دو رکنی بینچ نے جامعہ کراچی کے وائس چانسلر خالد عراقی کی تعیناتی قانون کے عین مطابق قرار دیتے ہوئے ریمارکس میں کہا ہے کہ بادی النظر میں وائس چانسلر خالد عراقی کی تعیناتی میں کوئی بے ضابطگی نہیں پائی گئی ، وزیر اعلیٰ سندھ مجاز اتھارٹی ہیں جنہوں نے پانچ قابل ترین امیدواروں کے انٹرویوز لے کر تعیناتی کا فیصلہ کیا، عدالت کی مداخلت کی کوئی گنجائش نہیں ، مونس احمد کی درخواست دو سال بعد مسترد کر دی گئی۔ تفصیلات کے مطابق مونس احمد نے دائر درخواست میں موقف اختیار کیا کہ وہ کراچی یونیورسٹی سے گریڈ 22 میں ریٹائر ہوئے اور اور وہ خالد عراقی کے ساتھ وائس چانسلر کے لئے امیدوار تھے، سرچ کمیٹی نے وزیر اعلیٰ سندھ کو منظوری کے لئے جو فہرست بھیجی تھی اس میں درخواست گزار کا نام خالد عراقی کے بعد دوسرے نمبر پر تھا، 28 جولائی 2022 کو خالد عراقی کو 4 سال کے لئے وائس چانسلر کی حیثیت سے تعینات کر دیا تھا جبکہ اخبارات میں جو اشتہار شائع ہوا تھا اس میں یہ شرط واضح تھی کہ امیدوار کے کم از کم 25 آرٹیکلز ہائر ایجوکیشن کمیشن پاکستان کے حمایت یافتہ ریسرچ پبلیکیشن میں 15 جولائی 2019 تک شائع ہوئے ہوں تاہم اٹارنی جنرل آف پاکستان نے عدالت کو بتایا کہ ہائر ایجوکیشن کمیشن نے ہائی کورٹ کی ہدایت پر تحقیقات کی تھی جس میں معلوم ہوا کہ خالد عراقی کے 35 آرٹیکلز شائع ہو چکے ہیں جبکہ 7
آرٹیکلز مقررہ تاریخ کے بعد شائع ہوئے ہیں۔
================
پاور سیکٹر سرکلر ڈیٹ، وفاق اور بینکوں درمیان فنانسنگ معاہدے میں اہم پیشرفت
24 ستمبر ، 2025FacebookTwitterWhatsapp
اسلام آ باد (رانا غلام قادر)پاور سیکٹر کے سرکلر ڈیٹ کو کم کرنے سے متعلق وفاقی حکومت اور بینکوں کے درمیان فنانسنگ معاہدے کے حوالے سے اہم پیش رفت سامنے آئی ہے۔ سرکلر ڈیٹ سے متعلق فنانسنگ سہولت معاہدے کی تقریب آج وزیراعظم آفس میں شیڈول ہوگئی۔ وزیراعظم شہبازشریف اور نائب وزیراعظم اسحٰق ڈار معاہدے پر دستخط کی تقریب میں ورچوئلی شریک ہوں گے جو امریکہ میں ہیں۔وفاقی کابینہ نے کمرشل بینکوں سے 1275 ارب روپے قرض لینے کی منظوری دے رکھی ہے، قرضے کی واپسی 24سہ ماہی اقساط میں ہو گی ۔سینٹرل پاور پرچیزنگ ایجنسی نے تقریب میں شرکت کے لیے اسٹیک ہولڈرز اور دیگر حکام کو مدعو کرلیا ہے،تقریب کے لیے 18 بینکوں اور ڈسکوز سمیت دیگر حکام کو دعوت دی گئی ہے۔ وزیر بجلی اویس لغاری سمیت متعدد وفاقی ورزا تقریب میں شریک ہوں گے۔آئی ایم ایف مشن ہیڈ، عالمی بینک اور ایشیائی ترقیاتی بینک کے کنٹری ڈائریکٹرز کو دعوت دی گئی ہےجبکہ چیئرمین نیپرا اور گورنر اسٹیٹ بینک سمیت دیگر اعلی حکام کو بھی شرکت کی دعوت دی گئی ہے۔
