پاکستانی اوپنر صاحبزادہ فرحان نے اپنی شاندار کارکردگی سے ایک اور سنگ میل عبور کرتے ہوئے ریکارڈ بک میں جگہ بنالی۔ دائیں ہاتھ کے بلے باز نے 2025ء میں محض 35 اننگز کھیلتے ہوئے 1500 رنز مکمل کیے اور اس کارنامے کو انجام دینے والے چوتھے پاکستانی بن گئے۔
اس سے قبل بابر اعظم، محمد رضوان اور شان مسعود بھی یہ اعزاز حاصل کر چکے ہیں۔ بابر نے 2019، 2021 اور 2024 میں تین مرتبہ ایک کیلنڈر ایئر میں 1500 رنز بنائے۔ رضوان نے 2021 اور 2022 میں یہ ریکارڈ قائم کیا، جبکہ شان مسعود نے 2022 میں یہ کارکردگی دکھائی تھی۔
2025ء میں فرحان نے پشاور ریجن، اسلام آباد یونائیٹڈ اور قومی ٹیم کی جانب سے نمایاں اسکورز کے ذریعے اپنی صلاحیتوں کا لوہا منوایا۔
ایشیا کپ 2025 کے سپر فور مرحلے میں بھارت کے خلاف ان کی نصف سنچری اور اس کے بعد منفرد جشن بھی سوشل میڈیا پر زیرِ بحث رہا۔ انہوں نے اکشر پٹیل کے اوور میں چھکا لگا کر اپنی ففٹی مکمل کی اور پھر بلے کو ’گولی چلانے‘ کے انداز میں لہرا کر جشن منایا، جسے شائقین نے بے حد پسند کیا۔ ان کی 50 رنز کی اننگز میں پانچ چوکے اور تین شاندار چھکے شامل تھے جنہوں نے بھارتی باؤلرز کے خلاف ان کے جارحانہ مزاج کو واضح کیا۔
میچ کے بعد پریس کانفرنس میں فرحان نے کہا کہ یہ جشن صرف ایک نیا اظہار تھا اور انہیں اس بات کی پرواہ نہیں کہ لوگ اس کا کیا مطلب نکالتے ہیں۔ ان کا کہنا تھا: “میں عام طور پر نصف سنچری کا جشن نہیں مناتا لیکن اس بار ایک نیا خیال آیا تو میں نے اسے منفرد انداز میں پیش کیا۔”
انہوں نے مزید کہا کہ وہ ہمیشہ اٹیکنگ کرکٹ کھیلنے کے حامی ہیں، “چاہے مخالف ٹیم بھارت ہی کیوں نہ ہو۔”
