بھارت کے دارالحکومت نئی دہلی کے ایئرپورٹ پر اس وقت ہلچل مچ گئی جب ایک 13 سالہ افغان لڑکا طیارے کے لینڈنگ گیئر میں چھپ کر پہنچ گیا۔
بھارتی میڈیا کے مطابق لڑکا کابل ایئرپورٹ کے ممنوعہ حصے میں داخل ہوا اور افغان ایئرلائن کی پرواز RQ 4401 کے پچھلے لینڈنگ گیئر کمپارٹمنٹ میں چھپ گیا۔ یہ پرواز تقریباً دو گھنٹے کا سفر طے کرنے کے بعد صبح 11 بجے نئی دہلی پہنچی۔ لینڈنگ کے بعد عملے نے لڑکے کو طیارے کے قریب گھومتے ہوئے دیکھا اور فوراً سکیورٹی کو اطلاع دی۔
ایئرپورٹ حکام نے لڑکے کو حراست میں لے کر تفتیش کے لیے ٹرمینل 3 منتقل کر دیا۔ ابتدائی معلومات کے مطابق وہ افغانستان کے صوبہ قندوز سے تعلق رکھتا ہے اور اس نے اعتراف کیا کہ اس نے یہ خطرناک قدم محض تجسس میں اٹھایا، اسے اس کے نتائج کا اندازہ نہیں تھا۔
طیارے کے مکمل معائنے کے دوران لینڈنگ گیئر میں ایک سرخ اسپیکر بھی ملا جس پر سکیورٹی خدشات کے باعث مکمل جانچ کی گئی۔ کلیئرنس کے بعد جہاز کو محفوظ قرار دیا گیا۔
بعد ازاں حکام نے لڑکے کو اسی پرواز کے ذریعے واپس افغانستان بھیج دیا۔
