محکمہ موسمیات نے آئندہ 24 گھنٹوں کے دوران ملک کے مختلف حصوں میں بارش اور گرج چمک کی پیشگوئی کی ہے۔ رپورٹ کے مطابق خیبرپختونخوا، اسلام آباد، خطہ پوٹھوہار، شمال مشرقی پنجاب، کشمیر اور گلگت بلتستان میں آندھی اور جھکڑ کے ساتھ بارش کا امکان ہے، جبکہ بالائی خیبرپختونخوا، پوٹھوہار اور ملحقہ پہاڑی علاقوں میں بعض مقامات پر تیز بارش اور ژالہ باری بھی ہو سکتی ہے۔ دوسری جانب بیشتر جنوبی اور وسطی علاقوں میں موسم خشک اور گرم رہنے کی توقع ہے۔
اسلام آباد اور قریبی علاقوں میں بارش اور گرج چمک کا امکان ہے، جبکہ راولپنڈی، مری، گلیات، جہلم، اٹک اور چکوال میں بھی بارش برسنے کی پیشگوئی ہے۔ پنجاب کے شہروں لاہور، سیالکوٹ، سرگودھا، خوشاب، نارووال، فیصل آباد، حافظ آباد، گجرات، منڈی بہاﺅالدین، قصور اور گوجرانوالہ میں بھی گرج چمک کے ساتھ بارش ہو سکتی ہے۔ بلوچستان کے جنوبی حصوں میں مطلع جزوی ابر آلود رہنے کا امکان ظاہر کیا گیا ہے جبکہ سندھ کے ساحلی علاقوں میں کہیں کہیں بارش متوقع ہے۔
خیبرپختونخوا کے مختلف اضلاع بشمول دیر، چترال، سوات، کوہستان، شانگلہ، بٹگرام، مانسہرہ، ایبٹ آباد، ہری پور، بونیر، مالاکنڈ، باجوڑ، مہمند، چارسدہ، نوشہرہ، مردان، صوابی، پشاور، کوہاٹ، ہنگو، کرک، وزیرستان، خیبر، اورکزئی اور کرم میں بھی بارش اور تیز ہوا چلنے کا امکان ہے۔
محکمہ موسمیات نے آزاد کشمیر اور گلگت بلتستان میں بھی گرج چمک اور تیز ہوا کے ساتھ بارش کی پیشگوئی کی ہے۔ گزشتہ 24 گھنٹوں کے دوران ملک کے بیشتر حصوں میں موسم گرم اور خشک رہا، تاہم بالائی خیبرپختونخوا کے کچھ مقامات پر بارش ہوئی اور کراچی میں ہلکی بوندا باندی ریکارڈ کی گئی۔
