پاکستان کے لیفٹ ہینڈ اوپنر صائم ایوب نے بدھ کو دبئی انٹرنیشنل کرکٹ اسٹیڈیم میں اے سی سی مینز ٹی ٹوئنٹی ایشیا کپ 2025 کے اہم مقابلے میں متحدہ عرب امارات کے خلاف مایوس کن کارکردگی دکھائی۔ وہ صرف دو گیندیں کھیلنے کے بعد بغیر کوئی رن بنائے آؤٹ ہوگئے اور ایک ناخوشگوار ریکارڈ اپنے نام کرلیا۔
24 سالہ بلے باز اس سے قبل بھی ٹورنامنٹ کے ابتدائی دونوں میچوں میں، جو اومان اور روایتی حریف بھارت کے خلاف کھیلے گئے تھے، پہلی ہی گیند پر صفر پر آؤٹ ہوچکے ہیں۔ اس طرح وہ اب تک ایشیا کپ کے تینوں میچوں میں رنز بنانے میں ناکام رہے ہیں۔
صائم ایوب اننگز کے پانچویں بال پر جنید صدیق کی گیند پر آؤٹ ہوئے۔ یہ ان کا ٹی ٹوئنٹی انٹرنیشنل میں آٹھواں “ڈک” تھا، جس کے بعد وہ اس فارمیٹ میں سب سے زیادہ مرتبہ صفر پر آؤٹ ہونے والے پاکستانی کھلاڑیوں کی فہرست میں شاہد آفریدی کے ساتھ مشترکہ طور پر دوسرے نمبر پر پہنچ گئے ہیں۔
اس ریکارڈ میں سب سے اوپر مڈل آرڈر بیٹر عمر اکمل ہیں، جو 84 میچز میں 10 بار بغیر رن بنائے پویلین لوٹے۔
