بھارتی کپتان سوریا کمار یادیو نے غیر سنجیدہ رویے کا مظاہرہ کرتے ہوئے متنازع بیان دے دیا۔ بھارتی میڈیا کے مطابق سوریا کمار یادیو نے کہا ہے کہ وہ ایشیا کپ جیتنے کی صورت میں ٹرافی محسن نقوی سے وصول نہیں کرنا چاہتے۔
بھارتی ٹیم مینجمنٹ نے ان کا یہ موقف باضابطہ طور پر ایشین کرکٹ کونسل کو پہنچا دیا ہے۔ یاد رہے کہ محسن نقوی اس وقت پی سی بی کے چیئرمین ہونے کے ساتھ ساتھ ایشین کرکٹ کونسل کے سربراہ بھی ہیں۔
ادھر پاکستان کرکٹ بورڈ (پی سی بی) نے ایک مرتبہ پھر آئی سی سی کو میچ ریفری کی تبدیلی کے حوالے سے خط لکھا ہے اور اپنے اصولی مؤقف کو دہراتے ہوئے کہا ہے کہ اینڈی پائیکرافٹ کو ہٹایا جائے۔ صورتحال کے باعث پاکستان اور متحدہ عرب امارات کے درمیان آج کھیلے جانے والے میچ کے انعقاد پر غیر یقینی کے بادل چھائے ہوئے ہیں۔
ذرائع کے مطابق پی سی بی واضح کر چکا ہے کہ اگر پائیکرافٹ کو تبدیل نہ کیا گیا تو ایشیا کپ کے باقی میچوں کا بائیکاٹ کیا جا سکتا ہے۔ مزید یہ کہ بورڈ کا کہنا ہے کہ ان ریفری کے خلاف آئی سی سی کی انکوائری محض رسمی کارروائی تھی، جس میں نہ تو تمام پہلوؤں کا جائزہ لیا گیا اور نہ ہی متعلقہ افراد سے مؤقف لیا گیا۔
