لاڑکانہ( رپورٹ محمد عاشق پٹھان) چیئرمین پاکستان پیپلز پارٹی بلاول بھٹو زرداری نے لاڑکانہ کے قریب دریائے سندھ کے موریا لوپ بند کا دورہ کیا، جہاں انہوں نے بند کی مضبوطی کے لیے محکمہ آبپاشی کی جانب سے جاری کام کا جائزہ لیا، دورے کے دوران صوبائی وزیر آبپاشی جام خان شورو اور سیکریٹری آبپاشی ظریف اقبال کیڑو نے چیئرمین پیپلز پارٹی بلاول بھٹو زرداری کو موریا بند پر ہاکی اسپُر اور پتھروں کی پچنگ کے جاری کام کے حوالے سے تفصیلی بریفنگ دی، سیکریٹری آبپاشی ظریف اقبال کیڑو نے چیئرمین بلاول بھٹو زرداری کو سیلابی ریلوں کے بہاؤ کے بارے میں بھی آگاہ کیا، بعد ازاں بلاول بھٹو زرداری نے موریا لوپ بند پر جاری پچنگ اور ہاکی اسپُر کے کام کا معائنہ بھی کیا، چیئرمین پیپلز پارٹی نے محکمہ آبپاشی کے
عملداروں کو بند کو مزید مضبوط بنانے کے لیے سختی سے ہدایات دیں، دوسری جانب چیئرمین پاکستان پیپلز پارٹی بلاول بھٹو زرداری میرپور بھٹو میں ڈہیسر ہاؤس پہنچے جہاں انہوں نے سندھ کے سابق گورنر اور سابق وزیراعلیٰ مرحوم سردار ممتاز علی بھٹو کے انتقال پر ان کے صاحبزادے سردار امیر بخش خان بھٹو سے تعزیت کی، مرحوم کے ایصالِ ثواب کے لیے فاتحہ خوانی کی اور گہرے دکھ کا اظہار کیا، اس موقع پر پیپلز پارٹی لاڑکانہ ڈویژن کے
صدر و رکن قومی اسمبلی اعجاز جکرا نی، سندھ اسمبلی کے سابق اسپیکر و رکن صوبائی اسمبلی آغا سراج درانی، صوبائی وزیر آبپاشی جام خان شورو، رکن صوبائی اسمبلی جمیل احمد سومرو، رکن صوبائی اسمبلی سہیل انور سیال، پی پی پی لاڑکانہ ڈویژن کے جنرل سیکریٹری عبدالفتاح بھٹو، حسن محمود شاہ امروٹی اور دیگر رہنما بھی موجود تھے۔
