لاڑکانہ(بیورو رپورٹ) لاڑکانہ میں آل پاکستان واپڈا ہائیڈرو الیکٹرک ورکرز یونین کی کال پر سیپکو مزدوروں کی جانب سے ملک گیر احتجاج کے سلسلے میں “یومِ مطالبات” مناکر حکومت کی بجلی کمپنیوں اور اداروں کی نجکاری کی پالیسی کے خلاف اور مطالبات کی منظوری کے لیے چیئرمین نثار احمد شیخ کی قیادت میں سرکل آفس سے جناح باغ چوک تک احتجاجی ریلی نکالی گئی، جس میں زونل چیئرمین عبداللہ سومرو، زونل سیکریٹری علی محمد جتوئی، ہادی بخش جتوئی، ریاض سانگی، محمود پٹھان سمیت ڈویژنل اور سب ڈویژنل عہدیداران نے شرکت کی، احتجاجی ریلی سے خطاب کرتے ہوئے مزدور رہنماؤں نے کہا کہ آئی ایم ایف کے اشارے پر بجلی کمپنیوں کی نجکاری کی جارہی ہے جو کہ مزدور دشمن عمل ہے، 
حکومت نے پہلے مرحلے میں آئیسکو، فیسکو اور گیپکو کو نجی شعبے میں دینے کا فیصلہ کیا ہے، حالانکہ یہ منافع بخش کمپنیاں ہیں، ان کمپنیوں کی نجکاری کرکے سرمایہ داروں کو خوش کرنے کی کوشش کی جارہی ہے، انہوں نے کہا کہ گزشتہ 8 سالوں سے ملازمین کی بھرتیاں نہیں ہوئیں، جس کی وجہ سے ایک مزدور 10 مزدوروں کا کام کرنے پر مجبور ہے اور انہیں حفاظتی سامان بھی فراہم نہیں کیا جارہا، رہنماؤں کا کہنا تھا کہ مہنگائی کے باعث تنخواہ سے گھر کا خرچ چلانا انتہائی مشکل ہوگیا ہے، اس کے علاوہ ہمارے پروموشن بھی روک دیے گئے ہیں جو کہ بڑی زیادتی ہے، انہوں نے مطالبہ کیا کہ بجلی کمپنیوں کی نجکاری روکی جائے، فوری طور پر بھرتیاں کی جائیں، ملازمین کو پروموشن دیا جائے اور تنخواہوں میں 100 فیصد اضافہ کیا جائے، بصورت دیگر تمام مزدور 17 ستمبر کو اسلام آباد ڈی چوک پر دھرنا دیں گے اور ہم اداروں کو بچانے کے لیے کسی قربانی سے دریغ نہیں کریں گے۔
