سندھ ٹیکنیکل بورڈ نے سالانہ امتحانات 2025 نویں جماعت کے نتائج کا اعلان کر دیا

کراچی () سندھ بورڈ آف ٹیکنیکل ایجوکیشن کراچی چیئرمین مشرف علی راجپوت کی خصوصی ہدایت پر سندھ بھر میں منعقدہ ٹیکنیکل اسکول سرٹیفکیٹ (TSC-I) حصہ اوّل نویں جماعت کے سالانہ امتحانات 2025 کے نتائج کا اعلان کر دیا۔ ترجمان ٹیکنیکل بورڈ زوہیب احمد خان کے مطابق کراچی ریجن سے مجموعی طور پر 2368 امیدوار امتحانات میں شریک ہوئے، جن میں سے 2050 امیدوار کامیاب قرار پائے۔ اس طرح کراچی ریجن کا کامیابی کا تناسب 86.75 فیصد رہا۔ دوسری جانب سکھر ریجن سے 222 امیدواروں نے امتحان دیا، جن میں سے 192 نے کامیابی حاصل کی۔ سکھر ریجن کا کامیابی کا تناسب 86.49 فیصد ریکارڈ کیا گیا۔

ناظم امتحانات سید اختر علی شاہ نے بتایا کہ نتائج کو ہر ممکن احتیاط اور شفافیت کے ساتھ مرتب کیا گیا ہے تاکہ کسی بھی امیدوار کے ساتھ ناانصافی نہ ہو۔

انہوں نے طلبہ کو ہدایت کی کہ اگر کسی امیدوار کو اپنے نتائج پر اعتراض ہو یا وہ اپنی جوابی کاپی کی جانچ کروانا چاہتا ہو تو وہ مقررہ فیس کے ساتھ چالیس دن کے اندر اندر درخواست جمع کروا سکتا ہے۔ اس مدت کے بعد کسی بھی درخواست پر غور نہیں کیا جائے گا۔

چیئرمین ٹیکنیکل بورڈ مشرف علی راجپوت کی خصوصی ہدایت پر تمام نتائج کی تفصیل بورڈ کی ویب سائٹ اپلوڈ کر دی گئی ہے، جبکہ ٹیکنیکل بورڈ سے الحاق شدہ تمام متعلقہ تعلیمی اداروں، حکومتی محکموں، اخبارات، اور ٹی وی چینلز کو بھی ارسال کردی تاکہ امیدواروں کو بروقت معلومات فراہم کی جا سکیں۔