بھارت کے سابق جنرل کی پاکستان کے خلاف آبی جارحیت سے متعلق ویڈیو پر قومی کرکٹ ٹیم کے سابق کپتان شاہد آفریدی نے سخت ردِعمل دیا ہے۔
سوشل میڈیا پر وائرل ویڈیو میں بھارتی فوج کے ریٹائرڈ لیفٹیننٹ جنرل کنول جیت سنگھ ڈھلوں نے پاکستان کو نقصان پہنچانے کے لیے پانی کو ہتھیار کے طور پر استعمال کرنے کا منصوبہ بیان کیا ہے۔
ایک انٹرویو میں انہوں نے کہا کہ بھارت اپنی بھرپور صلاحیت کے مطابق پانی کو روک سکتا ہے اور پھر اچانک بڑی مقدار میں پانی پاکستان کی طرف چھوڑ دے گا، جسے سنبھالنے کی پاکستان کے پاس صلاحیت محدود ہے۔ اس طرح ملک میں تباہ کن سیلاب آسکتا ہے اور پاکستان اس پانی کو بہتر طور پر استعمال بھی نہیں کرسکے گا۔
کنول جیت سنگھ ڈھلوں نے مزید کہا کہ گرمیوں میں جب کھیتوں کو پانی کی سب سے زیادہ ضرورت ہوتی ہے، اُس وقت پانی روک لیا جائے گا، اور برسات کے دنوں میں، جب ضرورت کم ہو، پانی چھوڑ دیا جائے گا تاکہ اسے بطور ہتھیار استعمال کیا جاسکے۔
اس بیان پر ردعمل ظاہر کرتے ہوئے شاہد آفریدی نے کہا کہ پانی انسان کی زندگی کا ذریعہ ہے، اسے ہتھیار بنانے کا سوچنا بھی غیر انسانی اور انتہا پسندی ہے۔ انہوں نے کہا کہ ماحولیاتی تبدیلیوں کے باعث تباہی ہر سال بڑھ رہی ہے، اس لیے وقت آگیا ہے کہ قومی قیادت ذاتی اور سیاسی اختلافات سے ہٹ کر ملک کے وسیع تر مفاد میں فیصلے کرے۔
سابق کپتان نے زور دیا کہ ڈیموں کی تعمیر، پانی کے ذخائر کا تحفظ اور ماحولیات کے لیے فوری اور مؤثر اقدامات ناگزیر ہیں۔ ان کے مطابق اگر آج اتفاقِ رائے سے حکمتِ عملی نہ اپنائی گئی تو مستقبل میں یہ بحران قابو سے باہر ہو جائے گا۔ آخر میں انہوں نے اپیل کی: “آئیں، مل کر پانی اور زندگی کو بچائیں۔”
