خبرنامہ نمبر 5926/2025
صحبت پور30 اگست۔ ڈپٹی کمشنر صحبت پور فریدہ ترین نے بچوں کو پولیو کے قطرے پلا کر ضلع بھر میں انسداد پولیو مہم کا باضابطہ طور پر آغاز کر دیا۔ یہ مہم یکم ستمبر سے چار ستمبر تک جاری رہے گا، جس کا مقصد ضلع صحبت پور کو پولیو جیسی موذی بیماری سے مکمل طور پر محفوظ بنانا ہے۔ افتتاحی تقریب کے موقع پر محکمہ صحت کے افسران، لیڈی ہیلتھ ورکرز، بھی موجود تھے۔ اس موقع پر ڈپٹی کمشنر فریدہ ترین نے کہا کہ انسداد پولیو مہم ایک قومی فریضہ ہے جس کی کامیابی ہم سب کی مشترکہ کوششوں سے ہی ممکن ہے۔ انہوں نے کہا کہ پولیو ایک خطرناک بیماری ہے جو بچوں کو عمر بھر کی معذوری میں مبتلا کر سکتی ہے، اس لیے ہر بچے تک پولیو ویکسین پہنچانا نہایت ضروری ہے۔ ڈپٹی کمشنر نے تمام متعلقہ اداروں، افسران، محکمہ صحت کی ٹیموں اور پولیو ورکرز کو ہدایت کی کہ وہ اپنے فرائض کو ایمانداری، لگن اور جذبے کے ساتھ سرانجام دیں اور گھر گھر جا کر پانچ سال سے کم عمر کے تمام بچوں کو پولیو کے قطرے پلائیں۔ انہوں نے اس عزم کا اظہار کیا کہ ضلع صحبت پور کو دیے گئے پولیو کے خاتمے کا ٹارگٹ ہر صورت حاصل کیا جائے گا اور اس سلسلے میں کسی قسم کی کوتاہی یا غفلت برداشت نہیں کی جائے گی۔ ڈپٹی کمشنر نے والدین سے بھی اپیل کی کہ وہ اپنے بچوں کو پولیو کے قطرے ضرور پلوائیں اور ٹیموں سے بھرپور تعاون کریں تاکہ ہم سب مل کر اس موزی بیماری کو جڑ سے ختم کر سکیں۔ انہوں نے یہ بھی کہا کہ ضلعی انتظامیہ پولیو مہم کی بھرپور مانیٹرنگ کرے گی اور تمام حساس اور دور دراز علاقوں تک رسائی یقینی بنائی جائے گی تاکہ کوئی بھی بچہ پولیو کے قطروں سے محروم نہ رہ جائے۔
خبرنامہ نمبر 5930/2025
سبی 30 اگست :ڈپٹی کمشنر سبی میجر (ر) الیاس کبزئی نے بختیار آباد کے علاقے میں لیویز چوکی کا دورہ کیا۔ اس موقع پر اسسٹنٹ کمشنر بختیار آباد میر بہادر خان بنگلزئی اور دیگر متعلقہ افسران بھی ان کے ہمراہ تھے۔ ڈپٹی کمشنر سبی نے لیویز چوکی میں امن و امان کے حوالے سے اجلاس کی صدارت کی، جہاں علاقے میں امن کی صورتحال، گشت کے نظام اور سکیورٹی اقدامات کا تفصیلی جائزہ لیا گیا۔ انہوں نے لیویز فورس کو ہدایت کی کہ شہر اور داخلی و خارجی راستوں پر سنیپ چیکنگ کو مزید مؤثر بنایا جائے تاکہ مشکوک عناصر پر کڑی نظر رکھی جا سکے۔ اس موقع پر ڈپٹی کمشنر نے چوکی پر موجود لیویز اہلکاروں کے ہتھیار اور دیگر سہولیات کا بھی معائنہ کیا۔ انہوں نے اہلکاروں کو ہمہ وقت چوکس رہنے اور عوامی جان و مال کے تحفظ کو یقینی بنانے کی ہدایت دیتے ہوئے کہا کہ امن و امان کے قیام کے لیے کسی قسم کی غفلت برداشت نہیں کی جائے گی۔ عوامی حلقوں نے ڈپٹی کمشنر سبی کے اس دورے اور بروقت ہدایات کو علاقے میں امن و استحکام کے لیے نہایت مثبت اور حوصلہ افزا قرار دیا۔
خبرنامہ نمبر 5931/2025
سبی 30 اگست :ڈپٹی کمشنر سبی میجر (ر) الیاس کبزئی نے سوشل میڈیا پر چلنے والی خبر کا فوری نوٹس لیتے ہوئے چار موری کے علاقے میں مرکزی پانی کے نالے میں پڑنے والے شگاف کا معائنہ کیا۔ اس موقع پر انہوں نے ایریگیشن حکام کو سختی سے ہدایت کی کہ شام تک نالے کی ٹوٹی ہوئی جگہ کی مرمت مکمل کرکے پانی کی فراہمی بحال کی جائے۔ ڈپٹی کمشنر سبی نے واضح کیا کہ عوامی سہولت اور پانی کی بروقت دستیابی اولین ترجیح ہے اور اس سلسلے میں کسی بھی قسم کی غفلت ہرگز برداشت نہیں کی جائے گی۔ ان کی ہدایت پر ایریگیشن محکمہ فوری طور پر متحرک ہو گیا اور متاثرہ مقام پر مرمتی کام تیزی سے شروع کر دیا گیا ہے۔ عوامی حلقوں نے ڈپٹی کمشنر سبی میجر (ر) الیاس کبزئی کے بروقت ایکشن کو سراہتے ہوئے کہا ہے کہ ان کے اقدامات سے عوامی مسائل فوری طور پر حل ہو رہے ہیں۔
پریس ریلیز
کوئٹہ 30 آگست پاکستان پیپلزپارٹی کے مرکزی کمیٹی کے رکن و رکن بلوچستان اسمبلی حاجی علی مدد جتک نے اسسٹنٹ کمشنر سریاب آفس میں پولیو مہم کا باقاعدہ افتتاح کردیا۔ افتتاحی تقریب میں اسسٹنٹ کمشنر سریاب سمیت مختلف محکموں کے افسران، سول سوسائٹی کے نمائندگان اور میڈیا کے افراد بھی شریک تھے۔اس موقع پر حاجی علی مدد جتک نے کہا کہ پولیو جیسی موذی مرض کے خاتمے کے لیے حکومت اور عوام کو یکساں کوششیں کرنا ہوں گی۔ انہوں نے والدین پر زور دیا کہ وہ اپنے پانچ سال سے کم عمر بچوں کو انسداد پولیو کے قطرے ضرور پلائیں تاکہ آئندہ نسل کو اس مہلک بیماری سے محفوظ بنایا جا سکے۔
انہوں نے مزید کہا کہ پولیو کے مکمل خاتمے کے لیے عوامی شعور بیدار کرنا وقت کی ضرورت ہے، والدین اور کمیونٹی ورکرز کی ذمہ داری ہے کہ وہ پولیو ٹیموں کے ساتھ بھرپور تعاون کریں۔واضح رہے کہ بلوچستان کے دارالحکومت کوئٹہ سمیت تمام اضلاع میں پولیو مہم یکم ستمبر سے 7 ستمبر تک جاری رہے گی جس کے دوران پانچ سال سے کم عمر لاکھوں بچوں کو پولیو سے بچاؤ کے قطرے پلائے جائیں گے۔ اس موقع پر اسسٹنٹ کمشنر سریاب نے بھی کہا کہ پولیو کے خلاف جنگ ایک قومی فریضہ ہے اور ضلعی انتظامیہ اس مہم کو کامیاب بنانے کے لیے تمام تر وسائل بروئے کار لائے۔
