کراچی کے علاقے ملیر، الفلاح ملت ٹاؤن میں ایک افسوسناک حادثے میں تین سالہ عون محمد ڈمپر کی ٹکر سے جاں بحق ہو گیا جبکہ اس کا ماموں سلمان زخمی ہو گیا۔
پولیس کے مطابق ملت ٹاؤن کے موڑ پر تیز رفتار ڈمپر نے موٹر سائیکل کو ٹکر مار دی، جس پر عون محمد ڈمپر کے ٹائر تلے آ گیا اور موقع پر ہی دم توڑ گیا۔ زخمی ماموں سلمان نے جناح اسپتال میں بتایا کہ وہ اپنے بھانجے کے ساتھ موٹر سائیکل پر جا رہے تھے کہ اچانک پیچھے سے آنے والے ڈمپر نے ٹکر ماری۔
زخمی ماموں کے مطابق جاں بحق ہونے والا بچہ والدین کا اکلوتا بیٹا تھا۔
پولیس نے بتایا کہ ڈمپر کا ڈرائیور فرار ہو گیا، تاہم اس کا کلینر اور ساتھی گرفتار کر لیے گئے ہیں اور ڈمپر کو تحویل میں لے لیا گیا ہے۔
