بھارتی ریاست اوڈیسہ میں ایک افسوسناک واقعہ پیش آیا جہاں 22 سالہ یوٹیوبر ساگر ڈوڈوما آبشار کے تیز بہاؤ میں بہہ گیا۔
اطلاعات کے مطابق ساگر اپنے دوست کے ساتھ کٹک سے کوراپٹ آیا تھا تاکہ اپنے یوٹیوب چینل کے لیے مشہور سیاحتی مقامات کی ویڈیوز بنا سکے۔ تاہم، حادثہ اس وقت پیش آیا جب وہ ڈرون کیمرے کے ذریعے ریلز ریکارڈ کر رہا تھا۔
سوشل میڈیا پر وائرل ہونے والی ویڈیو میں دیکھا جا سکتا ہے کہ ساگر پانی کے بیچ کھڑا ہے اور لوگ رسیوں کے ذریعے اسے بچانے کی کوشش کر رہے ہیں، مگر شدید پانی کے بہاؤ کے باعث وہ توازن برقرار نہ رکھ سکا اور موجوں نے اسے بہا لیا۔
https://www.instagram.com/reel/DNw7-6T2P4P/?utm_source=ig_embed&ig_rid=9fb71d09-1743-4369-87cd-f2e37e004d31
حکام کے مطابق ماچاکونڈا ڈیم سے شدید بارش کے بعد تقریباً 2000 کیوسک پانی چھوڑا گیا تھا، جس کی وجہ سے آبشار میں پانی کی سطح اچانک بلند ہوگئی۔ مقامی افراد اور سیاحوں کی کوششوں کے باوجود ساگر کو بچایا نہیں جا سکا۔
اطلاع ملتے ہی ماچاکونڈا پولیس اور فائر سروسز کے اہلکار موقع پر پہنچے اور ریسکیو آپریشن شروع کیا۔
بھارتی میڈیا کے مطابق ساگر کا ابھی تک سراغ نہیں ملا اور لاش کی تلاش جاری ہے۔
