پاکستان ریلوے نے اپنے نظام کو جدید اور مکمل طور پر ڈیجیٹل بنانے کے لیے ایک نیا پروگرام شروع کر دیا ہے۔
ریلوے حکام کے مطابق اس ڈیجیٹل پروگرام کا مقصد ٹرینوں کی حفاظت کو بہتر بنانا، تاخیر میں کمی لانا، اور مسافروں و مال برداری کی خدمات کو زیادہ مؤثر بنانا ہے۔
اس پروگرام کے تحت اہم سیکشنز پر جدید کمیونیکیشن اور سگنلنگ سسٹم نصب کیے جا رہے ہیں تاکہ ٹرین آپریشن زیادہ محفوظ اور مؤثر بنایا جا سکے۔
لانڈھی، جمعہ گوٹھ، بادل نالہ اور سرحد اسٹیشنز پر کمپیوٹرائزڈ انٹر لاکنگ سسٹم لگایا جا رہا ہے جو پرانے مینوئل کنٹرولز کی جگہ لے گا۔ اس سے ٹرینوں کی روانگی اور راستے کے تعین میں بہتری آئے گی اور حادثات کے خطرات کم ہوں گے۔
مزید برآں، کراچی سے لاہور سیکشن پر ٹیلی کام سسٹم کو اپ گریڈ کیا جا رہا ہے، جس میں ڈیجیٹل مائیکرو ویو ریڈیو کمیونیکیشن سسٹم شامل ہے تاکہ ٹرین آپریشن کے لیے ڈیٹا کی محفوظ اور مسلسل ترسیل یقینی بنائی جا سکے۔
اسی طرح راولپنڈی، لاہور، سکھر اور کراچی ڈویژنز میں ‘پش ٹو ٹاک’ ڈیجیٹل کمیونیکیشن نیٹ ورک بھی متعارف کرایا جا رہا ہے، جو فیلڈ اسٹاف اور کنٹرول رومز کے درمیان ریئل ٹائم رابطے کو مزید مضبوط کرے گا۔
ریلوے حکام کے مطابق اس ڈیجیٹل پروگرام کے نفاذ سے پاکستان ریلوے کے مجموعی ڈھانچے میں انقلابی تبدیلی آئے گی اور مسافروں کے ساتھ فریٹ سروسز کو بھی عالمی معیار کے مطابق بہتر بنایا جا سکے گا۔
