پاکستان کے معروف سپر اسٹار فواد خان اور بھارتی اداکارہ وانی کپور کی رومانوی فلم ‘عبیر گلال’ نے آخرکار بین الاقوامی سطح پر ریلیز کی نئی تاریخ حاصل کر لی ہے۔
یہ فلم آرتی ایس باگدی کی ہدایت کاری اور وویک بی اگروال کی پروڈکشن میں تیار کی گئی ہے، اور 12 ستمبر 2025ء سے دنیا کے 75 ممالک میں ایک ہزار سے زائد اسکرینز پر نمائش کے لیے پیش کی جائے گی۔
ابتدائی طور پر فلم 29 اگست کو ریلیز ہونے والی تھی، لیکن پاکستان اور بھارت کے درمیان کشیدگی کے سبب بھارت میں اس کی نمائش روک دی گئی تھی۔ تاہم، پروڈیوسرز نے فیصلہ کیا ہے کہ بھارت کے علاوہ باقی دنیا میں فلم کو نمائش کے لیے پیش کیا جائے گا۔
پروڈیوسرز کا کہنا ہے کہ بھارت میں ریلیز نہ ہونے کے باوجود ‘عبیر گلال’ بین الاقوامی سطح پر شاندار بزنس کرے گی۔ پاکستان میں یہ فلم 29 اگست کے اعلان کے مطابق ریلیز ہوگی، جس کے مداح بے صبری سے انتظار کر رہے ہیں۔
