مقبول نیٹ فلکس سیریز ایمیلی اِن پیرس کے اسسٹنٹ ڈائریکٹر ڈیاگو بورَیلا دوران شوٹنگ اچانک چل بسے۔
اطالوی میڈیا کے مطابق یہ واقعہ وینس، اٹلی میں پیش آیا، جہاں شو کے پانچویں سیزن کی ریکارڈنگ جاری تھی۔ 47 سالہ بورَیلا ہوٹل ڈینیلی میں شوٹنگ کی تیاری کر رہے تھے کہ اچانک گر پڑے۔ طبی عملے نے فوری طور پر ان کا علاج کرنے کی کوشش کی، لیکن وہ موقع پر ہی انتقال کر گئے۔
پیراماؤنٹ ٹیلی ویژن اسٹوڈیوز، جو یہ سیریز نیٹ فلکس کے لیے تیار کرتا ہے، نے واقعے کی تصدیق کرتے ہوئے کہا: “ہم انتہائی دکھ کے ساتھ اپنی پروڈکشن فیملی کے ایک رکن کی اچانک موت کی خبر کی تصدیق کرتے ہیں، اور اس مشکل وقت میں ہمارے دل مرحوم کے اہل خانہ اور عزیزوں کے ساتھ ہیں۔”
رپورٹس کے مطابق ڈیاگو بورَیلا کے انتقال کے بعد سیریز کی شوٹنگ عارضی طور پر روک دی گئی ہے۔ پانچویں سیزن کی شوٹنگ 15 اگست سے وینس میں شروع ہوئی تھی اور 25 اگست تک مکمل ہونے والی تھی۔ اطلاعات کے مطابق بورَیلا کی آخری رسومات کے بعد شوٹنگ دوبارہ شروع کی جائے گی۔
یاد رہے کہ ایمیلی اِن پیرس ایک رومانٹک کامیڈی سیریز ہے جسے پہلی بار 2020 میں کورونا وباء کے دوران ریلیز کیا گیا تھا، اور اس کا پانچواں سیزن رواں سال کے آخر تک نیٹ فلکس پر ریلیز کیا جائے گا۔
