بالی ووڈ کی نئی فلم پرَم سندری کا گانا Danger ریلیز ہوتے ہی سوشل میڈیا پر بحث کا موضوع بن گیا ہے۔ پاکستانی صارفین کا دعویٰ ہے کہ اس گانے کی دھن اور انداز جیو ٹی وی کے ڈرامہ منت مراد کے مقبول ٹائٹل ٹریک لال سوٹ سے خاصی مماثلت رکھتا ہے۔
یہ گانا جھانوی کپور اور سدھارتھ ملہوترا پر فلمایا گیا ہے، جس میں نہ صرف میوزک بلکہ رقص کے انداز بھی پاکستانی گانے سے ملتے جلتے قرار دیے جا رہے ہیں۔
مداحوں نے بالی ووڈ پر ایک بار پھر ’’کاپی کلچر‘‘ کا الزام لگاتے ہوئے کہا کہ بھارت کے پاس نئے اور تخلیقی آئیڈیاز ختم ہو گئے ہیں۔ کئی لوگوں نے نشاندہی کی کہ Danger کا بیٹ پیٹرن اور کمپوزیشن لال سوٹ سے ملتا ہے، جو ڈرامے کی شادی کی تقریبات میں خاصا مقبول ہوا تھا۔
ایک صارف نے طنزیہ تبصرہ کرتے ہوئے کہا، “بالی ووڈ یا تو پاکستان کے گانے کاپی کرتا ہے یا پھر پاکستانی فنکاروں پر پابندی لگاتا ہے۔”
جبکہ دوسرے نے لکھا، “مجھے پہلے ہی لگا تھا کہ یہ دھن کہیں سنی ہوئی ہے، یہ تو بالکل لال سوٹ کی نقل نکلی۔”
