لاہور بورڈ کے نتائج میں ایک سکھ طالب علم اونکار سنگھ نے شاندار کارکردگی دکھا کر سب کو حیران کر دیا۔ نہم جماعت کے امتحانات میں اونکار سنگھ نے اسلامیات لازمی میں 100 میں سے 98 اور ترجمۃ القرآن المجید میں 50 میں سے 49 نمبر حاصل کیے۔ صوبائی وزیرِ تعلیم رانا سکندر حیات نے طالب علم کو مبارکباد دی اور ساتھ ہی یہ سوال بھی اٹھایا کہ اگر ایک غیر مسلم طالب علم اتنی اچھی کارکردگی دکھا سکتا ہے تو پھر مسلمان بچوں کو فیل کرنے والے اساتذہ کا احتساب کیوں نہ کیا جائے؟
وزیرِ تعلیم کی جانب سے سوشل میڈیا پر شیئر کیے گئے رزلٹ کارڈ کے مطابق اونکار سنگھ نے صرف اسلامیات میں ہی نہیں بلکہ دیگر مضامین میں بھی غیر معمولی کامیابی حاصل کی۔ اردو میں 75 میں سے 74، انگلش میں 75/75، ریاضی اور کیمسٹری میں بھی پورے نمبر، فزکس میں 60/60 اور بائیولوجی میں 59 نمبر لے کر انہوں نے اے ون گریڈ حاصل کیا۔
یاد رہے کہ پنجاب کے تعلیمی بورڈز نے نویں جماعت کے سالانہ امتحانات کے نتائج کا اعلان کر دیا ہے۔ لاہور بورڈ کے تحت 3 لاکھ 8 ہزار 73 طلبہ نے امتحان دیا جن میں سے ایک لاکھ 38 ہزار 894 کامیاب ہوئے۔ مجموعی کامیابی کی شرح 45.08 فیصد رہی، لڑکیوں کا کامیابی تناسب 53.83 فیصد جبکہ لڑکوں کا صرف 35.33 فیصد رہا۔ سائنس گروپ میں کامیابی کی شرح 47.47 فیصد اور آرٹس گروپ میں 37.37 فیصد ریکارڈ کی گئی۔
https://x.com/RanaSikandarH/status/1959109134659277035?ref_src=twsrc%5Etfw%7Ctwcamp%5Etweetembed%7Ctwterm%5E1959109134659277035%7Ctwgr%5Ea391011cafd65bc9d97a448622b33a36377bc4f1%7Ctwcon%5Es1_c10&ref_url=https%3A%2F%2Fwww.urdupoint.com%2Fdaily%2Flivenews%2F2025-08-23%2Fnews-4532893.html
