محکمہ موسمیات نے پیش گوئی کی ہے کہ ملک میں مون سون بارشوں کا آٹھواں سلسلہ 23 اگست سے شروع ہوگا۔ 22 اگست کی رات سے مغربی ہوائیں ملک کے بالائی حصوں میں داخل ہوں گی، جس کے بعد راولپنڈی، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد اور وزیرآباد سمیت دیگر علاقوں میں بارشیں متوقع ہیں۔
محکمہ موسمیات کے مطابق 23 سے 27 اگست کے دوران بالائی دریاؤں میں شدید بارشوں کے باعث پانی کے بہاؤ میں تیزی کا خدشہ ہے۔ اس صورتحال کے پیش نظر پی ڈی ایم اے پنجاب نے الرٹ جاری کر دیا ہے۔ ترجمان کے مطابق دریائے جہلم، چناب، راوی، ستلج اور ان سے منسلک ندی نالوں میں پانی کی سطح بلند ہونے کا امکان ہے۔
پی ڈی ایم اے نے صوبے بھر کے کمشنرز اور ڈپٹی کمشنرز کو ہدایت دی ہے کہ دریائے ستلج کے کناروں پر رہائش پذیر شہریوں کو فوری طور پر محفوظ مقامات پر منتقل کیا جائے۔ ڈی جی پی ڈی ایم اے پنجاب عرفان علی کاٹھیا نے کہا کہ لوکل گورنمنٹ، آبپاشی، زراعت، صحت، جنگلات، لائیو اسٹاک اور ٹرانسپورٹ سمیت متعلقہ محکموں کو پہلے ہی الرٹ جاری کر دیا گیا ہے تاکہ کسی بھی ہنگامی صورتحال سے نمٹا جا سکے۔
انہوں نے مزید کہا کہ وزیراعلیٰ پنجاب کی ہدایت کے مطابق انتظامات پیشگی مکمل کیے جائیں، ریسکیو ٹیموں کو حساس مقامات پر تعینات کیا جائے اور بارش کے دوران عوام کو پیشگی اطلاع دی جائے۔ اس کے ساتھ مساجد اور مقامی ذرائع سے شہریوں کو آگاہ کرنے کی ہدایت بھی دی گئی ہے۔
پی ڈی ایم اے نے عوام سے اپیل کی ہے کہ وہ ضلعی انتظامیہ اور ریسکیو اداروں کے ساتھ تعاون کریں اور حفاظتی ہدایات پر لازمی عمل کریں۔
