خیبر پختونخوا میں حالیہ بارشوں اور فلش فلڈز کے نتیجے میں اب تک مختلف حادثات میں 393 افراد جان کی بازی ہار چکے ہیں جبکہ 190 افراد زخمی ہوئے ہیں۔
پی ڈی ایم اے نے صوبے کے مختلف اضلاع میں ہونے والے جانی اور مالی نقصان کی رپورٹ جاری کی ہے۔ ترجمان پی ڈی ایم اے کے مطابق، جاں بحق افراد میں 300 مرد، 53 خواتین اور 40 بچے شامل ہیں، جب کہ زخمیوں میں 145 مرد، 27 خواتین اور 18 بچے شامل ہیں۔
رپورٹ کے مطابق، 1618 گھروں کو نقصان پہنچا ہے، جس میں 1185 گھروں کو جزوی اور 433 گھروں کو مکمل طور پر نقصان ہوا ہے۔
سب سے زیادہ متاثرہ ضلع بونیر میں ہلاکتوں کی تعداد 234 اور صوابی میں 42 تک جا پہنچی ہے۔ دیگر متاثرہ اضلاع میں سوات، باجوڑ، مانسہرہ، شانگلہ، دیر لویر اور بٹگرام شامل ہیں۔
پی ڈی ایم اے نے متاثرہ اضلاع کی انتظامیہ کو ریلیف اور امدادی کارروائیاں تیز کرنے اور متاثرین کو فوری مدد فراہم کرنے کی ہدایت کی ہے۔ ادارے کا ایمرجنسی آپریشن سینٹر مکمل طور پر فعال ہے۔ عوام کسی بھی ہنگامی صورتحال یا موسمی اطلاعات کے لیے فری ہیلپ لائن 1700 پر رابطہ کر سکتے ہیں۔
