پاکستان نے بھارتی پروازوں کے لیے اپنی فضائی حدود کی بندش میں ایک ماہ کا مزید اضافہ کر دیا ہے۔ نوٹم کے مطابق بھارتی ایئرلائنز 23 ستمبر تک پاکستان کی فضائی حدود استعمال نہیں کر سکیں گی۔ اس حوالے سے پی اے اے کی جانب سے نیا نوٹیفکیشن بھی جاری کر دیا گیا ہے۔
واضح رہے کہ پاکستان نے 23 اپریل سے بھارتی طیاروں کے لیے اپنی فضائی حدود بند کر رکھی ہے، اور اب اس فیصلے میں ایک بار پھر توسیع کی گئی ہے۔ یہ اقدام دونوں ممالک کے درمیان جاری کشیدگی کے تناظر میں کیا گیا ہے۔
رپورٹس کے مطابق فضائی حدود کی اس بندش کے باعث بھارتی ایئرلائنز کو اب تک تقریباً 35 ارب روپے کا نقصان برداشت کرنا پڑا ہے، جس سے ان کی مالی مشکلات میں اضافہ ہو رہا ہے۔
پاکستان کا کہنا ہے کہ یہ فیصلہ قومی سلامتی اور اپنی فضائی حدود کے تحفظ کے پیشِ نظر کیا گیا ہے، اسی لیے بھارت کو کسی بھی قسم کی پروازوں کی اجازت نہیں دی گئی۔
