پاکستانی اداکار اور ٹی وی میزبان عمران اشرف کی آنے والی کینیڈین بھارتی پنجابی فلم ’اینا نوں رہنا سہنا نئیں آندا‘ کا ٹریلر جاری کر دیا گیا ہے۔ یہ فلم 22 اگست کو پاکستان سمیت دنیا بھر کے سینما گھروں میں نمائش کے لیے پیش کی جائے گی۔
عمران اشرف اس کینیڈین بھارتی پنجابی پروڈکشن سے قبل متعدد پاکستانی فلموں میں نظر آچکے ہیں، تاہم یہ ان کی پہلی فلم ہے جس میں وہ غیر ملکی پروڈکشن کا حصہ ہوں گے۔ فلم کی بڑی کاسٹ کینیڈین نژاد بھارتی اداکاروں پر مشتمل ہے، جبکہ کچھ پاکستانی پنجابی اداکار بھی اس میں جلوہ گر ہوں گے۔
فلم ’اینا نوں رہنا سہنا نئیں آندا‘ میں عمران اشرف مرکزی کردار ادا کریں گے، اور ہدایت کاری روپن بال کے ذمے ہے۔ فلم میں بھارتی پنجابی گلوکار اور اداکارہ جیسی گل بھی ایکشن میں دکھائی دیں گی۔ دیگر اہم اداکاروں میں رنجیت باوا، مینڈے ٹکھڑ، سپنا پبی، نمال رشی، ناصر چنیوٹی اور نوپریت بانگا شامل ہیں۔
ٹریلر سے کہانی مکمل طور پر واضح نہیں ہوتی، مگر عندیہ ملتا ہے کہ فلم نوجوان طلبہ کے گرد گھومتی ہے۔ رومانٹک کامیڈی کے اس ٹریلر کو کافی پذیرائی حاصل ہوئی ہے اور فلم کی ٹیم نے اس کی ریلیز 22 اگست کو کرنے کا اعلان کیا ہے۔
