مون سون کی شدید بارشوں کے باعث مانسہرہ اور مری میں تعلیمی ادارے دو روز کے لیے بند رکھنے کا اعلان کیا گیا ہے۔
تفصیلات کے مطابق مانسہرہ میں حالیہ بارشوں اور سیلابی صورتحال کے پیشِ نظر ضلعی انتظامیہ نے نوٹیفکیشن جاری کرتے ہوئے تمام اسکول 19 اگست تک بند کرنے کا فیصلہ کیا ہے۔ ڈپٹی کمشنر مانسہرہ کا کہنا ہے کہ یہ اقدام طلبہ اور اساتذہ کی حفاظت کے پیشِ نظر اٹھایا گیا ہے۔
اسی طرح مری کی انتظامیہ نے بھی پی ڈی ایم اے پنجاب کی ہدایات پر عمل کرتے ہوئے آئندہ دو روز کے لیے تعلیمی ادارے بند کرنے کا نوٹیفکیشن جاری کر دیا ہے۔ مری میں اب تک 74 ملی میٹر بارش ریکارڈ ہو چکی ہے جبکہ مزید بارش اور لینڈ سلائیڈنگ کا خدشہ ظاہر کیا گیا ہے۔
دوسری جانب سٹی ٹریفک پولیس مری نے سیاحوں کے لیے ایڈوائزری جاری کی ہے جس میں کہا گیا ہے کہ پہاڑی علاقوں کے غیر ضروری سفر سے گریز کیا جائے۔ دورانِ بارش اور دھند میں گاڑی کی رفتار کم رکھنے، فوگ لائٹس اور ڈبل اشارے استعمال کرنے، غلط اوورٹیکنگ اور ڈبل لائن بنانے سے اجتناب کرنے کی ہدایت دی گئی ہے۔ مزید کہا گیا ہے کہ گاڑیاں صرف مختص شدہ مقامات پر پارک کی جائیں تاکہ کسی بھی ہنگامی صورتحال میں ٹریفک کی روانی متاثر نہ ہو۔
ترجمان ٹریفک پولیس کے مطابق چیف ٹریفک آفیسر مری وسیم اختر اور ڈی ایس پی ٹریفک خود فیلڈ میں موجود ہیں جبکہ اضافی نفری بھی تعینات کر دی گئی ہے۔ ایمرجنسی کی صورت میں سیاح ٹریفک کنٹرول نمبر 0519269200 پر رابطہ کر سکتے ہیں۔
پی ڈی ایم اے کے ترجمان نے بتایا کہ آئندہ 48 گھنٹوں کے دوران راولپنڈی، مری، جہلم، چکوال اور اٹک میں مزید بارشوں کا امکان ہے اور کلاؤڈ برسٹنگ کے خطرات بھی موجود ہیں، اس لیے شہریوں کے تحفظ کو یقینی بنانے کے لیے تمام وسائل استعمال میں لائے جا رہے ہیں۔
