محکمہ موسمیات نے پوٹھوہار علاقے میں شدید بارشوں کی وارننگ جاری کردی ہے۔ پی ڈی ایم اے پنجاب کے ڈائریکٹر جنرل عرفان علی کاٹھیا کے مطابق بارشوں کی شدت کے باعث پوٹھوہار ریجن میں تباہی کا خدشہ پیدا ہوگیا ہے، بالخصوص دریاؤں کے قریب رہائش پذیر مکانات کو پہلے ہی خالی کرایا جا چکا ہے، جیسا کہ بونیر میں ہوا تھا۔
راولپنڈی میں پریس کانفرنس کے دوران انہوں نے بتایا کہ یہ ساتواں مون سون اسپل ہے اور بارشیں وقفے وقفے سے جاری ہیں۔ اگلے 48 گھنٹوں میں مزید بارشیں متوقع ہیں۔ تربیلا ڈیم بھرنے کے بعد درمیانے درجے کے سیلاب کا خطرہ موجود ہے، اور دریائے ستلج میں 74 ہزار کیوسک پانی داخل ہو رہا ہے۔ چیف منسٹر کی ہدایت پر دونوں دریاؤں کے قریب مکانات خالی کروا دیے گئے ہیں تاکہ نقصان سے بچا جا سکے۔
انہوں نے بتایا کہ ریلیف کمشنر پنجاب نے تمام حفاظتی اقدامات کی تصدیق کی ہے اور آئندہ 72 گھنٹوں میں پوٹھوہار میں سیلاب کے خطرات کے پیش نظر جہلم اور چکوال ندی نالوں کی ارلی وارننگ جاری کی گئی ہے۔ مری ایکسپریس وے پر لینڈ سلائیڈنگ ہوئی ہے، شہریوں کو مری جانے سے گریز کرنے کی ہدایت کی گئی ہے۔ چیف منسٹر نے تمام ضروری وسائل کی فراہمی کی یقین دہانی کرائی ہے اور ضرورت پڑنے پر دیگر صوبوں کو بھی امدادی سامان بھیجا جائے گا۔
عرفان علی کاٹھیا نے کہا کہ نالوں پر تجاوزات کے خاتمے کی ہدایات جاری ہیں، نالہ لئی کی ڈی سلٹنگ کا عمل مکمل کیا جا رہا ہے اور موجودہ نقصان کے ازالے کے لیے تمام اقدامات کیے جا رہے ہیں۔ موسمیاتی تبدیلی کے مسئلے پر انہوں نے زور دیا کہ یہ صرف حکومت کا کام نہیں، بلکہ قوم کو بھی کردار ادا کرنا ہوگا۔
انہوں نے مزید کہا کہ تمام کمشنرز اور ڈپٹی کمشنرز کے ساتھ مل کر حفاظتی اور ریسکیو کے انتظامات مکمل کر لیے گئے ہیں۔ ہر جگہ کلاؤڈ برسٹ کے امکانات یکساں نہیں، تاہم زیادہ بارش کی صورت میں سیلابی صورتحال پیدا ہو سکتی ہے۔ اگلے 48 گھنٹوں میں مزید بارشوں کی توقع ہے اور تربیلا ڈیم بھرنے کے بعد ساڑھے چار لاکھ کیوسک پانی دریائے سندھ میں بہہ رہا ہے۔
