صوبہ خیبرپختونخوا کے دارالحکومت پشاور میں موسلادھار بارش نے شہر کے کئی علاقوں میں شدید مشکلات پیدا کر دی ہیں۔ بارش کے باعث سبزی منڈی میں پانی جمع ہو گیا اور کاروباری سرگرمیاں معطل ہو گئیں۔ صدر بازار، کوہاٹی بازار، موچی بازار اور دیگر مرکزی علاقوں میں پانی کھڑا ہوگیا۔
وزیراعلیٰ خیبرپختونخواہ علی امین گنڈاپور کی ہدایت پر بارش کے فوری بعد پشاور میں ریلیف آپریشن شروع کیا گیا۔ واٹر اینڈ سینیٹیشن سروسز اور ریسکیو 1122 کی ٹیمیں بروقت صفائی اور نکاسی آب کے عمل میں مکمل طور پر متحرک ہو گئیں۔ شاہین، مسلم ٹاؤن اور دیگر علاقوں میں سڑکوں سے پانی نکال کر کلیئرنس کی گئی، اس دوران نالیوں سے کمبل اور دیگر رکاوٹیں بھی نکالی گئیں۔
ریسکیو حکام کے مطابق شہر کے نشتر آباد، گلبہار، کوہاٹ روڈ، یونیورسٹی روڈ، پریس کلب روڈ اور حیات آباد سمیت مختلف علاقوں میں 70 سے زائد اہلکار تعینات ہیں، جن کے ہمراہ 8 ایمبولینسز، 2 ڈیزاسٹر ریسپانس گاڑیاں اور 6 ڈی واٹرنگ پمپس موجود ہیں۔
ڈیزاسٹر ٹیمیں شہر بھر میں پٹرولنگ کر رہی ہیں تاکہ سڑکوں پر جمع پانی کو نکالا جا سکے اور پھنسے ہوئے شہریوں اور گاڑیوں کو محفوظ مقامات تک پہنچایا جا سکے۔ مختلف علاقوں میں ڈی واٹرنگ کا عمل جاری ہے اور ریسکیو 1122 کی ٹیمیں کسی بھی ہنگامی صورتحال سے نمٹنے کے لیے مکمل طور پر تیار ہیں۔
