ننگشیا کی گوجی بیری

اعتصام الحق ‘
چین کے ننگشیا ہوئی خود اختیار علاقے کی مشہور گوجی بیری ایک ایسی منفرد پیداوار ہے جو نہ صرف چین بلکہ پوری دنیا میں اپنی غذائی اور طبی خصوصیات کی وجہ سے مشہور ہے۔ گوجی بیری کی تاریخ ہزاروں سال پرانی ہے ۔اسے انگریزی زبان میں وولف بیری کہا جاتا ہے، ۔ یہ پودا اصل میں ایک جنگلی جھاڑی تھا جو بعد میں چین میں باقاعدہ طور پر کاشت کیا جانے لگا۔ چین وہ پہلا ملک ہے جہاں اس کے بارے میں تحریری ریکارڈز اور مصنوعی کاشت کے ثبوت موجود ہیں۔یہاں تک کہ چینی لوک کہانیوں اور اساطیر میں بھی گوجی بیری کے بارے میں کئی دلچسپ قصے بیان کیے جاتے ہیں۔
گوجی بیری کی پیداوار اور دوسرے ممالک کو اس کی فروخت کی تاریخ بھی بہت پرانی ہے ۔ چین کا ننگشیا ہوئی خود اختیار علاقہ اپنی جغرافیائی حیثیت کی وجہ سے چین کو وسطی ایشیا اور یورپ سے جوڑنے والا ایک ا ہم علاقہ تھا اور ہے اور یہی علاقہ قدیم سلک روٹ کا بھی ایک اہم پڑاؤ تھا ۔یہی وجہ ہے کہ اس خطے میں پیدا ہونے والی خاص گوجی بیری نے دنیا بھر کا سفر کیا اور چین کی پہچان بنی ۔
نگشیا کی گوجی بیری چین کی معیشت میں اہم کردار ادا کرتی ہے۔ یہ خطہ چین میں گوجی بیری کی سب سے بڑی پیداواری اور برآمدی مرکز ہے۔ گوجی بیری کی صنعت نہ صرف مقامی لوگوں کے لیے روزگار کے مواقع فراہم کرتی ہے بلکہ چین کی زرعی برآمدات میں بھی اہم حصہ ڈالتی ہے۔ گوجی بیری کی مصنوعات جیسے کہ خشک بیریاں، جوس، چائے، اور دیگر غذائی سپلیمنٹس دنیا بھر میں برآمد کی جاتی ہیں اور ان کی مانگ مسلسل بڑھ رہی ہے۔ اس سے ننگشیا کی معیشت کو فروغ ملتا ہے اور یہ اس علاقے کی ترقی میں اہم کردار ادا کرتی ہے۔
ننگشیا کے لیے گوجی بیری محض ایک فصل نہیں بلکہ اس خطے کی ثقافت اور شناخت کا اہم حصہ ہے۔ گوجی بیری کی کاشت اور تجارت ننگشیا کے لوگوں کے لیے صدیوں سے روایت رہی ہے۔ جدید دور میں بھی یہ صنعت ترقی کر رہی ہے اور نئی ٹیکنالوجیز کے ذریعے گوجی بیری کی کوالٹی اور پیداوار میں اضافہ کیا جا رہا ہے۔ ننگشیا کی حکومت نے گوجی بیری کو عالمی سطح پر متعارف کرانے اور اس کی برانڈ ویلیو بڑھانے کے لیے کئی اقدامات کیے ہیں۔ اس کے تحت گوجی بیری کے تحقیقاتی ادارے قائم کیے گئے ہیں جو اس کی افادیت اور نئی مصنوعات کی تیاری پر کام کر رہے ہیں۔یہاں کئی ایسے ادارے اور کمپنیز کام کر رہی ہیں جو اس بیری کی نشو نما اور اس کی بہتر فصل میں دور جدید کی ضرورتوں کے مطابق اپنا حصہ ڈال رہی ہیں۔
ننگشیا کی گوجی بیری اپنی بے پناہ غذائی اور طبی افادیت کی وجہ سے مشہور ہے۔ اس کی وجہ اس خطے کے خاص جغرافیائی اور موسمی حالات ہیں ۔یہ خطہ اپنے منفرد موسم، دھوپ سے بھرپور ماحول، معدنیات سے بھرپور مٹی اور پانی کی وجہ سے گوجی بیری کی کاشت کے لیے مثالی ہے۔ چین کے روایتی طب میں گوجی بیری کو “دواؤں اور خوراک کا ہمزاد” سمجھا جاتا ہے۔ اس کے پتے سبزی کے طور پر، جڑیں بوٹیوں کے طور پر اور بیریاں مختلف صحت بخش فوائد کے لیے استعمال ہوتی ہیں۔ چینی طب کے مطابق، گوجی بیری بینائی کو بہتر بناتی ہے، جگر کی صحت کو فروغ دیتی ہے، قوت مدافعت بڑھاتی ہے اور عمر بڑھنے کے عمل کو سست کرتی ہے۔
گوجی بیری کی عالمی شہرت نے ننگشیا کو چین اور دنیا بھر میں ایک اہم مقام دلایا ہے۔ننگشیا کی گوجی بیری کی کامیابی اس خطے کے کسانوں، سائنسدانوں اور تاجروں کی محنت اور لگن کا نتیجہ ہے۔