سوات کے علاقے منگلور میں آنے والے سیلاب سے گورنمنٹ پرائمری سکول شدید متاثر ہوا، تاہم سکول کے پرنسپل کی بروقت حکمت عملی کی بدولت سیکڑوں بچوں کی جانیں محفوظ رہیں۔
گورنمنٹ پرائمری سکول منگلور کے ہیڈ ماسٹر سعید احمد نے بتایا کہ سیلاب کے دن صبح قریبی ندی میں پانی اچانک بڑھ گیا۔ صورتحال کا جائزہ لیتے ہوئے انہوں نے تمام اساتذہ کو ہدایت دی کہ بچوں کو چھٹی دے دی جائے۔ اس دوران پانی سکول میں داخل ہو گیا اور اسکول کی بیرونی دیوار بھی گر گئی۔
ہیڈ ماسٹر کے فوری اقدامات کی بدولت اسکول میں زیر تعلیم تمام 936 بچوں کو محفوظ مقام پر منتقل کر دیا گیا۔ سعید احمد کے مطابق صرف پانچ منٹ کے اندر پورا سکول سیلاب سے متاثر ہوا اور تمام کلاس رومز اور دفاتر میں پانی بھر گیا، تاہم کسی کا جانی نقصان نہیں ہوا۔
انہوں نے حکومت سے درخواست کی کہ سیلاب سے متاثرہ اسکول کی فوری مرمت اور بحالی کے لیے اقدامات کیے جائیں۔
