پشاور سے کراچی جانے والی عوام ایکسپریس چند روز کے اندر دوسری مرتبہ خوفناک حادثے سے دوچار ہوگئی۔ پنجاب کے ضلع لودھراں کے قریب رات گئے ٹرین سامنے کھڑی مال گاڑی کے انجن سے ٹکرا گئی۔ حادثے میں ایک مسافر جاں بحق جبکہ 19 زخمی ہوئے، جن میں سے دو افراد کی حالت تشویشناک بتائی جاتی ہے۔ زخمیوں اور لاش کو فوری طور پر ڈی ایچ کیو اسپتال منتقل کر دیا گیا۔
ریسکیو حکام کے مطابق تصادم کے باعث عوام ایکسپریس کی پانچ بوگیاں پٹری سے اتر گئیں جن میں سے تین بری طرح متاثر ہوئیں۔ اطلاع ملتے ہی امدادی ٹیمیں جائے وقوعہ پر پہنچیں اور مسافروں کو بحفاظت نکال کر اسپتال منتقل کیا۔ حکام کے مطابق حادثے کے باوجود اپ اور ڈاؤن ٹریک پر ٹرینوں کی آمدورفت معمول کے مطابق جاری رہی، جبکہ مرمت اور کلیئرنس کے بعد عوام ایکسپریس کو بھی دوبارہ روانہ کر دیا گیا۔
واضح رہے کہ چند روز قبل رحیم یار خان کے قریب بھی عوام ایکسپریس حادثے کا شکار ہوئی تھی، جس میں تین بوگیاں پٹری سے اتر گئی تھیں۔ خوش قسمتی سے اُس حادثے میں کوئی جانی نقصان نہیں ہوا تھا البتہ ڈاؤن ٹریک پر ٹرین سروس متاثر ہوئی تھی۔
