دیر میں ایک بہادر ریسکیو اہلکار نے اپنی جان خطرے میں ڈال کر دریا کے سیلابی پانی میں پھنسے ایک شہری کو محفوظ مقام تک پہنچا دیا۔ شہری کو تیز بہاؤ بہا کر لے جا رہا تھا لیکن ریسکیو ٹیم نے فوری کارروائی کرتے ہوئے اسے زندہ بچا لیا۔
ادھر، پی ڈی ایم اے کی رپورٹ کے مطابق، خیبر پختونخوا کے ضلع باجوڑ سمیت متعدد علاقوں میں لینڈ سلائیڈنگ اور سیلابی ریلوں کے نتیجے میں 204 افراد جاں بحق اور 33 تاحال لاپتا ہیں۔ ادارے نے گزشتہ 24 گھنٹوں میں ہونے والی موسلا دھار بارش اور فلش فلڈ کے باعث صوبے کے مختلف اضلاع میں ہونے والے جانی و مالی نقصانات کی ابتدائی تفصیلات جاری کی ہیں۔
رپورٹ کے مطابق ان حادثات میں مجموعی طور پر 205 ہلاکتیں ہو چکی ہیں، جن میں 128 مرد، 9 خواتین اور 13 بچے شامل ہیں، جبکہ 33 افراد لاپتا اور 15 زخمی ہیں۔ زخمیوں میں 12 مرد، 2 خواتین اور ایک بچہ شامل ہے۔
مزید یہ کہ بارشوں اور فلش فلڈ کے نتیجے میں اب تک 35 مکانات کو نقصان پہنچا، جن میں سے 28 جزوی طور پر اور 7 مکمل طور پر تباہ ہو گئے۔ یہ واقعات سوات، بونیر، باجوڑ، تورغر، مانسہرہ، شانگلہ اور بٹگرام کے اضلاع میں پیش آئے، جبکہ سب سے زیادہ متاثرہ علاقے باجوڑ اور بٹگرام ہیں، جہاں امدادی کارروائیاں بدستور جاری ہیں۔
