چین کے بیجنگ شہر میں دنیا کے پہلے ہیومینائیڈ روبوٹ گیمز کا آغاز ہوگیا، جہاں افتتاحی تقریب میں روبوٹس نے ایتھلیٹکس ریسز، فٹبال میچز اور ڈانس پرفارمنسز کے ذریعے تماشائیوں کو محظوظ کیا۔
یہ مقابلے 15 اگست سے 17 اگست تک جاری رہیں گے، جن میں 16 ممالک کی مجموعی طور پر 280 ٹیمیں حصہ لے رہی ہیں۔
ایونٹ میں کل 26 مختلف مقابلے شامل ہیں، جن میں مسابقتی کھیل، پرفارمنس اور دیگر سرگرمیاں شامل ہیں، تین روزہ مقابلوں کے دوران کل 487 میچز کھیلے جائیں گے۔
روایتی کھیلوں کے علاوہ خصوصی چیلنجز بھی رکھے گئے ہیں، جیسے دوائیں ترتیب دینا، سامان سنبھالنا اور صفائی کی خدمات انجام دینا۔
اس ایونٹ کا مقصد دنیا کے سامنے مصنوعی ذہانت اور روبوٹکس میں ہونے والی ترقی کو پیش کرنا ہے۔
شرکاء میں امریکا، جرمنی، برازیل سمیت دیگر ممالک کی ٹیمیں شامل ہیں، جبکہ چین کی مشہور روبوٹکس کمپنیاں یونی ٹری اور فورئیر بھی مقابلوں میں حصہ لے رہی ہیں۔
280 ٹیموں میں سے 192 یونیورسٹیوں کی نمائندگی کر رہی ہیں اور 88 ٹیمیں نجی اداروں کی ہیں۔
